عمرو مصطفى بينحت ألحان وإحنا نجحنا من غير دعاية وسوشيال ميديا.. أبرز تصريحات أورتيجا التليفزيونية
حل مطرب المهرجانات أورتيجا، ضيفًا على أحد البرامج التليفزيونية، وتحدث خلال الحلقة عن عدة موضوعات مختلفة، كما علق على اتهامات الملحن عمرو مصطفى لمطربي المهرجانات بسرقة الألحان، وكشف طبيعة علاقته بالمطرب أوكا حاليًا.
أبرز تصريحات أورتيجا التليفزيونية
-علاقتي مع أوكا مستمرة وإحنا أخوات وفيه تواصل بيننا رغم عدم وجود أعمال غنائية تجمعنا بقالنا فترة.
-فيه ناس كتير سابوا بعض بالعشرين سنة ورجعوا وربنا له يد وحكمة في كل حاجة.
-لو حد سرق من عمرو مصطفى لحن يرفع عليه قضية لكن ميجمعش ويقول كل المطربين اللي نجحوا زمان نجحوا بالسرقة.
-كلها بتسرق وعمرو مصطفى نفسه بينحت ألحان وإحنا فاهمين كل حاجة.
-بيتدعى علينا عشان طلعنا المهرجانات وإحنا اللي شلنا المشاريب وبيتقال إن أوكا وأورتيجا هما اللي بوظوا البلد.
أورتيجا: أنا أكتر حد لبس من الوكالة.. وإحنا اتغفلنا ونجحنا في وقت صعب
-أنا أكتر حد في العالم لبس من الوكالة وأنا ترزي أصلا وعندي مكنة خياطة بشتري حاجات من الوكالة وأعمل فيها اللي أنا عايزه وأمشي مفيش حد لابس زيي.
-حلم حياتي أعمل خط أزياء لأني بعرف أرسم وأعمل موديلات.
-كورونا خربت بيوت الناس كلها وأنا منهم.
-حفلاتي الجاية في البحرين والأردن ودبي وفيه جولة في أمريكا 12 حفلة.
-إحنا اتغفلنا ونجحنا في وقت صعب من غير دعاية وقبل انتشار السوشيال ميديا.
-إحنا ناس قديمة من قبل السوشيال ميديا فمتعودين ننزل الأغنية تنجح من غير رعاة بس دلوقتي هتتشاف بس لما تعمل حملات إعلانية لأغانيك.
-مؤخرًا في كام هاكر خربوا حياتي وقفلولي أكونتاتي وعملت صفحات جديدة من الصفر.
-بحب ويجز جدا وبحب دماغه هو مثقف وذكي وكاريزما والشخص المثقف بيسبق ناس كتير.
-بحب من مطربي المهرجانات عنبة وزوكش وصواريخ وإسلام ساسو.
-اتخضيت لما اتعرض لي أغنية في ميدان تايمز سكوير في نيويورك، وبالنسبالي أنا قفّلت اللعبة وعملت كل حاجة في مجالي.
