أمينة خليل: محمد ممدوح ممثل مش أناني.. وواجهنا صعوبة في عدم الضحك بكواليس وش في وش
تحدثت الفنانة أمينة خليل، عن أجدد أعمالها، فيلم وش في وش، بالإضافة إلى كواليسه، التي وصفتها بأنها كانت مليئة بالمرح والكوميديا، كما أعربت عن سعادتها بالتعاون مع الفنان محمد ممدوح.
وقالت أمينة خليل، عن محمد ممدوح، خلال حوارها مع القاهرة 24، على هامش العرض الخاص لفيلم وش في وش أمس: تايسون حبيبي وزميلي وصديقي، بتبسط أوي وبرتاح في الشغل معاه، بنطلع من بعض أحلى حاجة.
أمينة خليل: محمد ممدوح مش أناني
وأشادت بمحمد ممدوح، قائلة: هو ممثل مش أناني، دايما بيخلي الممثل اللي قدامه يطلع أحسن حاجة عنده، ودي أكتر حاجة بحبها فيه، وإحنا تفكيرنا متناسق جدًا في اختيار الأعمال، ودي حاجة بحبها أوي وهو قلبه أبيض.
وعن تشابه الفكرة العامة لفيلم وش في وش، مع مسلسل أمينة خليل الأخير، الهرشة السابعة، قالت: أنا مختارتش إني أناقش نفس الموضوع في عملين ورا بعض، برغم إني شايفة إن كل عمل فيهم بيناقش قضايا الزواج بطريقة مختلفة، واحد دراما جدا وواحد كوميدي جدا، فممكن الناس تكون شايفة إن العملين بيناقشوا نفس الموضوع ولكن هما بطريقة مختلفة تماما.
أمينة خليل تعلق على تشابه وش في وش مع الهرشة السابعة
وتابعت: الهرشة السابعة كان له دعوة أكتر بالمشاكل بين الزوجين نفسهم، لكن في فيلم وش في وش بنناقش موضوع اللي هو خلوا بالكوا من دخول الناس في مشاكل الزوجين ومتبقوش ودانيين، عشان تدخل الناس في بيتكم بيؤدي لمشاكل كبيرة.
وكشفت أمينة خليل كواليس فيلم وش في وش، قائلة: الكواليس كانت مضحكة جدا بحكم إننا 12 ممثل، ومعانا بيومي فؤاد ومحمود الليثي، فطبعا الأجواء كانت لطيفة جدا وضحك طول الوقت، واتبسطنا أوي في الكواليس.
صعوبات تصوير فيلم وش في وش
وعن الصعوبات التي واجهت فريق عمل وش في وش، قالت أمينة خليل: الموضوع كان صعب جدا في الأول عشان كنا 12 ممثل في نفس الوقت، ففكرة إن إحنا نتجمع ونركز عشان ندخل نعمل مشهد ده خد وقت، بس وش في وش مش نوع الفيلم اللي كان في حاجة صعبة نفسيًا، يمكن أكتر صعوبة واجهاناه إننا نمسك نفسنا ومنضحكش وهي الناس بتمثل حوالينا.
واختتمت أمينة خليل حديثها، كاشفةً تفاصيل شخصيتها في فيلم وش في وش، وقالت: بجسد دور بنت مصرية شبهنا وفي سننا، متجوزة ومخلفة، والقصة بتدور حوالين القصة الأساسية، وهو موضوع بيناقشوا كل أبطال الفيلم، وأنا عجبني الكوميدي وعايزة أقعد هنا شوية في المنطقة دي.
فيلم وش في وش
يضم فيلم وش في وش، عددا كبيرا من الفنانين، أبرزهم الفنانة أمينة خليل، محمد ممدوح، أحمد خالد صالح، بيومي فؤاد، أنوشكا، وغيرهم.
