علاء مرسي: بجسد شخصية مخترع في الليلة كبيرة.. والعمل مع سليمان عيد شرف
كشف الفنان علاء مرسي، تفاصيل شخصيته في مسلسل الليلة كبيرة، الذي يجمعه مع الفنانة هالة فاخر، ومن المقرر أن يُعرض خلال الفترة المقبلة.
وقال علاء مرسي، في لقائه مع القاهرة 24: أنا بجسد شخصية مخترع في مسلسل الليلة الكبيرة، وحضرت سليمان عيد في المعمل كعفريت سابق واتكون وطلع في الحارة ضربهم وبقى سفاح، وجيت ارجعه تاني مرجعش.
وعن تعاونه مع الفنان سليمان عيد، فعلق علاء مرسي قائلًا: سليمان عيد نجم كبير، وأنا بتشرف إني بشتغل مع سليمان عيد، لأنه من الممثلين المهمين وعنده ثقل وأدواره مهمة.
علاء مرسي: لو اتعرض عليا فيلم مرعي البريمو تاني مش هوافق عليه
ومن ناحية أخرى، تحدث الفنان علاء مرسي، عن مشاركته في فيلم مرعي البريمو بطولة الفنان محمد هنيدي، وذلك خلال تصريحاته، قائلًا: مرعي البريمو حقق نجاحا كبيرا جدًا ولكن الانتقادات مش طبيعية، وأنا ممكن احترم ناس متحبش الفيلم بشكل معين، ولكن في ناس بتنتقد من غير ما تتفرج، وياريت كل الناس تتفرج ولو معجبكش قوم امشي ده حقك لكن متنتقدش من غير ما تتفرج.
وأضاف علاء مرسي: لو اتعرض عليا دوري في الفيلم تاني هطلب تعديل معين في الشخصية، لأني بشوف حاجات بقول ياريت كنت عملتها بشكل تاني، الدور كان كويس ولكن الفكرة أن كان ناقصه شوية حاجات اكتشفتها بعد ما الفيلم اتعرض كانت محتاجة تتعمل.
