بعنا دهب زوجاتنا علشان نسدد الأقساط.. مشادات بين العملاء وموظفي شركة شيري أريزو 5 بسبب عيوب صناعة| بث مباشر

نظم العشرات من أصحاب سيارات شيري أريزو 5، وقفة احتجاجية أمام مقر الشركة وكيل العلامة التجارية في مصر، بسبب مشاكل وعيوب في الصناعة وعدم اهتمام الشركة بمحاولة تصليحها، وهو ما تسبب في خسائر مادية جسيمة لهم.

عيوب صناعة بسيارات شيري أريزو 5

وقال إبراهيم حماد، إنه خلال عام 2022، تعاقد على شراء سيارة شيري أريزو 5، من التوكيل الشهير ببيعها داخل مصر، موضحا أنه عقِب السير بالسيارة لحوالي 30 ألف كيلو ظهرت مشاكل في ناقل السرعة الفتيس، وهو ما استدعى ضرورة تغييره من قبل الوكيل وبالفعل تم حجز السياراة لمدة 3 أشهر لإصلاح السيارة، ولكن سرعان ما عادت المشكلة من جديد بعد السير بها 15 ألف كيلو، وتطلب الأمر تغييره من جديد، لكن الشركة رفضت بسبب صدمة بالهيكل الخارجي الأمامي للسيارة.

وأضاف قائلا: ازاي توكيل محترم معروف وشركة كبيرة زي دي.. وبدل ما يحاول يحل المشكلة بجدية حاول يهرب من المشكلة.. وحاول في المرة التانية يقول إن المؤثر الخارجي وهو الخطبة الخارجية السبب.. وبيحاول دايما يدور لنفسه على مخرج مع كل الناس بدل ما يحل المشكلة.. ودايما كانوا بيحاولوا يدونا مسكنات وأعذار علشان يأخرونا.. ومنها إن قطع الغيار لسه بتتشحن وجاية في الطريق.

وتابع قائلا: أسوأ معاملة بنشوفها جوه الفرع.. وبيحاولوا يهربوا من التصوير.. وبيخرجونا وطردونا بره فرع الشركة وإحنا واقفين في الشمس والحر.. وزوجتنا باعت الدهب علشان نقدر نسدد القسط بتاع البنك.. واستلفنا فلوس من قرايبنا وإخواتنا علشان نقدر نسدد..