صبري فواز يرد على طارق الشناوي بعد وصفه بالـ عصيّ على التصنيف: عملت كتير علشان أوصل لده
تحدث الفنان صبري فواز عن بداية عمله في التمثيل، وتفاصيل رحلة كفاحه، كما تحدث عن الشخصية التاريخية التي يتمنى تقديمها إلى جانب رده على وصف طارق الشناوي له بأنه عصيّ على التصنيف.
وقال صبري فواز في لقائه ببرنامج مصر الجديدة مع الإعلامية إنجي أنور: طعم النجاح حلو، وميزة طعم النجاح أنك وأنت بتستطعم النجاح بيكون ممزوج بطعم الرحلة كلها فبيكون عندك ميكس حلو وشهي.
ووصف مشوراه التمثيلي قائلًا: رحلتي طويلة ومرهقة وممتعة ومفيدة، ولو هيكون لها موسيقى تصويرية هيكون فيلم حياتي لا هسلم بالمكتوب ولا هرضى أبان مغلوب، لأن كان عندي إحساس أن فيه حاجة حلوة جاية وجوايا يقين أن هيحصل حاجة طالما الواحد بيعمل كل اللي عليه حتى لو اتأخرت لأن ده أوانها أو مكانها ويمكن لو بدري شوية ما كنتش أكون جاهز ليها لأن الميعاد اللي ربنا اختاره هو اللي مظبوط وأنا بعمل أقصى مجهود ومطلوب مني أكون مركز والباقي بتاع ربنا.
وعن رأيه في وصف الناقد طارق الشناوي له بأنه عصيّ على التصنيف قال: أشكره على جملته، جملة حلوة أوي، لأني عملت كتير علشانها وعلشان ما أتصانفش في حتة واستغنيت عن أدوار كتير علشان كده فلما الناس تشوف ده والنقاد كمان دي شيء يفرحني جدا.
وكشف صبري فواز الشخصية التاريخية التي يتمنى تقديمها قائلًا: أتمنى أقدم شخصية تاريخية سواء لغة عامية أو فصحى وأحب أجسد شخصية زكريا الحجاوي لأنها الشخصية التاريخية الأقرب لقلبي، لأنه صاحب رحلة عظيمة في استكشاف الفن المصري الشعبي ولف البلد.
