متكامل وصادق.. فايزة هنداوي تكشف أسباب اختيار اللجنة فيلم فوي فوي فوي لترشيحه لـ الأوسكار
كشفت الناقدة فايزة هنداوي، عضو لجنة المشاهدة بنقابة المهن السينمائية، أسباب اختيار اللجنة لفيلم فوي فوي فوي، وترشيحه للمنافسة على جائزة أوسكار أفضل فيلم دولي.
وقالت فايزة هنداوي في تصريح خاص لـ القاهرة 24: فوي فوي فوي اتعرض آخر فيلم، وكلن الفيلم اللي بيتعرض الأول زي اللي بيتعرض في الآخر، وبنختار الأفضل بين المعروض بصرف النظر عن توقيت عرضه، في فترة محددة اللايحة بتاعة أوسكار في أمريكا عملاها، فبنختار من بين أفلام الفترة دي، وفوي وفوي فوي طلع بأغلبية الأصوات.
وتابعت فايزة هنداوي: اللجان بتختلف عن بعض، يعني ممكن فيلم ياخد أحسن فيلم في لجنة تحكيم، ويروح مهرجان تاني مياخدش حاجة، فده مش معناه إن باقي أفلام القائمة وحش.
فايزة هنداوي: فوي فوي فوي إلى حد ما متكامل
وعن أسباب وقوع اختيار اللجنة على فيلم فوي فوي فوي تحديدًا، قالت فايزة هنداوي: الفيلم اللي بنختاره بيكون في معايير فنية كتير نختار على أساسها، بدءًا من السيناريو والإخراج وكل عناصر الفيلم، فـ فيلم فوي فوي فوي إلى حد ما متكامل وصادق وحقيقي ومعبر عن مصر، بتشوفيه بتحسي بأجواء مصرية والشباب المصري.
واختتمت هنداوي حديثها قائلةً: تصوير الفيلم وتقنيات الصوت المستخدمة كويسة أوي، السيناريو متماسك ومحكوم، فـ فوي فوي فوي كان من أحسن الأفلام من وجهة نظر اللجنة ولكن مش في المطلق، يعني مش معناه خالص إن الأفلام التانية وحشة.
فيلم فوي فوي فوي
يشارك في بطولة فيلم فوي فوي فوي كل من: الفنان محمد فراج، بسنت شوقي، نيللي كريم، طه دسوقي، وغيرهم، والعمل من تأليف وإخراج عمر هلال.
