طارق العريان عن تقديم جزء ثالث من ولاد رزق: لو مكنش في فكرة مكناش هنعمله.. ومينفعش نستسهل
كشف المخرج طارق العريان، السر وراء نجاح الجزأين الأول والثاني من فيلم ولاد رزق، مشيرًا إلى أنه لو لم يجد فكرة جديدة ليقدمها في الجزء الثالث من العمل، لن يقدمه.
وقال طارق العريان خلال ندوته بـ القاهرة 24، متحدثًا عن نجاح الجزأين الأول والثاني من ولاد رزق: سواء بتعمل فيلم منفصل أو سلسلة أفلام من أجزاء، أهم حاجة في الآخر إنك تعمل فيلم كويس، طول ما بتعمل فيلم كويس بأي نوع ده هيكون المقياس الحقيقي للنجاح.
وتابع طارق العريان: ولو معندناش فكرة تخلينا نعمل جزء تالت من ولاد رزق مكناش هنعمله، وبقول ممكن نعمل تالت ورابع وخامس، مدام تقدر تطلع فيلم جيد والناس حابة الشخصيات والجو العام للفيلم، ومينفعش نستسهل في الجزء الجديد ونقول ما كدة كدة الفيلم ناجح.
وأضاف طارق العريان: وجزء كبير من نجاح الأفلام لو قدرت تبني الشخصية اللي الناس حباها ومصدقاها، فكرة إنك بتعمل مصداقية للشخصية بتفاصيلها، الناس بتبدأ تتابع وتحب، زي فيلم السلم والتعبان فكرته بسيطة جدا بس الشخصيات اتصدقت واتحبت.
طارق العريان: السير الذاتية فيها قيود رهيبة
وكان كشف طارق العريان رغبته في تقديم عمل تاريخي، بجانب رأيه في تحويل السير الذاتية لأعمال فنية، قائلًا: نفسي أعمل عمل تاريخي، ولكن متكونش شخصية حساسة أو شخصية مقدرش ألعب فيها، ودايما السير الذاتية فيها قيود رهيبة.
