هاني الدقاق: لا أمانع من ديو غنائي مع مطربي الراب.. وأغنية نص الحاجات الأقرب إلى قلبي
كشف الفنان هاني الدقاق عن إمكانية مشاركة فريق مسار إجباري في ديو غنائي مع مطربين الراب، بجانب الحديث عن رأيه في فكرة المنافسة بين فرقته وفرقة كايروكي.
وقال هاني الدقاق خلال لقائه مع القاهرة 24: إحنا كفرقة مسار إجباري بنسمع كل أنواع المزيكا بنحب نسمع راب، أغلبية الناس اللي موجودين في الراب دلوقتي عفرتو وويجز وبابلو كلهم الحقيقة عندهم أغاني كويسة جدَا، وإحنا بنتبسط لو لقينا أغنية مناسبة نعملها معاهم.
وعن ديو الغنائي الذي جمعهم مع المطرب دياب، تابع هاني الدقاق قائلًا: الفنان دياب من الشخصيات اللطيفة اللي ممكن تتعرفي عليها في حياتك، وإحنا حابين جدًا نشتغل مع كل الحاجات فاتبسطنا لما عجبته الأغنية.
تحدث هاني الدقاق عن أكثر الأغاني الذي تعبر عنه من أعماله، حيث قال: كل أغاني مسار إجباري بتوصف مواقف خاصة، بس ممكن أغنية نص الحاجات بتعبر عني جدًا، والأغنية دي بتوصف الحياة ومناسبة للفترة اللي أحنا فيها.
ورد هاني الدقاق على فكرة وجود منافسة بين فرقة مسار إجباري وفرقة كايروكي، حيث أوضح: المنافسة جميلة اليومين دول لإن كل واحد بيجيب أخره وإحنا كلنا سن واحد وبنحب بعض وأتعرفنا على بعض سواء في حفلة قبل كده، بنغير لما حد بيعمل حاجة حلوة بس بنشجعه جدًا عليها وأنا شايفها حاجة صحية وأتمنى تفضل مستمرة.
