مراد مكرم مستنكرًا شكوى بعض الفنانين من قلة العمل: يمكن ربنا مش رايد لك الشغلانة أصلا
استنكر الفنان مراد مكرم شكوى بعض الفنانين من قلة العمل، وعدم منحهم فرصا للمشاركة في أعمال فنية، موجهًا نصيحة لهم حيث يرى أن على كل شخص تقديم أحسن ما لديه وقد يكون غير موفقا للعمل بالفن.
وقال مراد مكرم في لقائه مع القاهرة 24: ربك بيرزق من كذا حتة وفيه ناس بتشكتي أنه مش بييجي لها شغل، وخاصة الشباب، ويمكن ربنا مش رايد له أو يمكن ربنا مش رايد لهم دلوقتي وهيعملو أحسن بعدين، أو يمكن مش رايد لهم الشغلانة دي أصلا، ليه محدش بيفكر في الجزء ده.
وأضاف مراد مكرم: أنت تنحت في الصخر وتعمل أحسن ما عندك ولو جت تقول أشكرك يا رب ما جتش يبقى مش بتاعتي، ما مشيش أقول أنا مش لاقي شغل، لأ الشغل كتير أوي مش بس في مصر فيه منصات وقنوات في كل حتة في العالم لو أنت موهوب هتشتغل.
في سياق آخر، استنكر الفنان مراد مكرم النقد الذي يوجه إلى الفنانين على السوشيال ميديا بشكل مستمر، وقال خلال لقائه مع القاهرة 24: فيه فرق بين النقد والجليطة وقلة الذوق، وإحنا بقينا على السوشيال ميديا وبشكل عام مش بنعمل حساب لمشاعر الفنان اللي هو إنسان، وفيه ناس بتطلع غلبها ومشاكلها في الفنانين، والفنان ده بيعمل لك الترفيه اللي بيبعد دماغك عن مشاكلك ولو مؤقتا، أنت بقى عاوز تفعصه هتستفيد إيه.. طيب تعالى نقلب الآية لو أي حد فعصك هتتبسط؟
فيلم حسن المصري
ويعرض لـ مراد مكرم حاليًا فيلم حسن المصري الذي يشارك فيه مع الفنان أحمد حاتم ومجموعة من الفنانين، إذ بدأ عرضه بدور السينما أمس، والفيلم قصة نورا لبيب، سيناريو وحوار سمر طاهر ومن إخراج سمير حبشي.
