كرمها السادات والسيسي.. الممرضة الفدائية سيدة كمشوشي عن حصار السويس: افتكروني مُتّ.. والجنود كانوا مصممين على الفوز |بث مباشر

كشفت الممرضة الفدائية سيدة كمشوشي، تفاصيل تكريمها من الزعيم الراحل محمد أنور السادات، والرئيس عبد الفتاح السيسي، بسبب بطولاتها خلال حصار السويس.

وقالت المواطنة سيدة حسن رزق كمشوشي، إنها كرمت أمس من الرئيس عبد الفتاح السيسي، خلال الاحتفال بذكرى أكتوبر، مضيفة: القاعة كلها بلا استثناء كانت بتحييني، ومكنتش أتوقع إن دا هيحصل، ومكنتش أتخيل إني ممكن أوصل للمرحلة دي.

وتابعت سيدة كمشوشي: كل العساكر والظباط استقبلوني استقبال رهيب وكانوا.. بيبوسوا إيدي ويقولولي إنتي مشرفانا.

وتابعت سيدة كمشوشي: اتحاصرنا 100 يوم وخلال الحرب كل العساكر كان روحهم المعنوية مرتفعة ومكانش فيه يأس والكل كان مصمم على الفوز.. الأخبار اتقطعت وقفلوا علينا الطريق وأهلي افتكروني مُتّ، وبعثت رسالة لأهلي علشان أطمنهم عليا.

واستكملت سيدة كمشوشي: كنت بعالج مريض والضرب كان شغال، واتحايلوا عليا علشان أمشي لكن رفضت وقولتلهم مش مهم أموت.. مكناش بنستحمى ولا نغسل شعرنا وكنا بنشرب المياه مالحة.. المرضى كانوا محتاجين مياه علشان يقدروا يعيشوا، وخاطرت بحياتي والضرب كان شغال وروحت جبتلهم مياه علشان أنقذهم.

وأشارت سيدة كمشوشي إلى أنها كانت المسئولة عن بنك الدم خلال الحرب، وأن والدها توفي خلال تواجدها في حصار السويس، واضطرت للرجوع بعد انتهاء الحرب كون والدتها سيدة مسنة وتحتاج إلى الرعاية.