رحلة طلعت زكريا مع المرض في ذكرى وفاته.. منعوا عنه تناول المياه وأصيب بالتهاب بأحد شرايين المخ
تحل اليوم الذكرى الخامسة لوفاة الفنان طلعت زكريا الذي رحل عن عالمنا في مثل هذا اليوم 8 أكتوبر عام 2019، عن عمر ناهز 59 عامًا نتيجة أزمة صحية، تاركًا لنا العديد من الأعمال التي ما زالت محفورة في أذهان الجمهور.
رحلة طلعت زكريا مع المرض
كشف الفنان طلعت زكريا خلال لقاء تليفزيوني سابق تفاصيل معاناته مع المرض، قائلًا: في عز الأزمات والألم اللي كنت فيها كان عندي يقين إن ربنا هيرجعني تاني مش عارف ليه، وأصلا مكنش حد يشوفني ويقول إني هرجع، مش أرجع أمثل لا أرجع أعيش تاني، مؤمن إن التعب مش بلاء ده قرصة ودن، فقعدت أفكر وأنا على سرير المستشفى اشمعنا أنا اللي يجيلي الفيرس ده، اللي بيجي لواحد في المليون.
وأردف طلعت زكريا: في كل مليون بني آدم ربنا اختارني، قعدت أفكر لقيت نفسي رايح في حته وحشة بعد فيلم حاحا وتفاحة، انهالت عليا العروض وكانت الفلوس بتترمي قدامي وييجي المنتجين يسيبوا فلوس ويمشوا، فبدأ إحساس الغرورو يركبني شوية، وبقيت أفكر في حاجات مش حلوة وكنت خلاص ماشي فيها، كنت ماشي في كل شيء ممكن تسميه خطأ في الحياة، وكنت عمال أخبط في الدنيا، فقولت لنفسي لا اصحى بقى ربنا اللي عمل فيك كده وخلاك تكون حاحا وأنت ناوي بالكرم اللي ربنا ادهولك تعمل كده لا فوق بقي.
وأضاف طلعت: أثناء 3 سنين تعبي عمري ما قولت ليه يا رب أو اشمعنا، بس كان عندي يقين إني هبقى كويس كنت بقرأ قرآن، وكان بيدخل عليا عصابات من الدكاترة ياخدوا حقنة من النخاع علشان محسش بوجع الحقنة، كنت بقول ربنا مبيعملش حاجة وحشة ولا بيأذي بني آدم إحنا اللي بنأذي نفسنا، ربنا جميل.
مواقف مؤثرة في حياة طلعت زكريا
وفي أحد اللقاءات، سرد طلعت زكريا موقفًا مؤثرًا تعرض له أثناء رحلة المرض، وقال: كانوا مانعين عنى المايه وأنا كنت لما بعطش كانوا بيجبولي إسبراي مايه، علشان أحس بطعم المايه، وكنت ممنوع من الأكل والشرب، وفي يوم كنت في المستشفى وشايف إزازة مايه واتعكزت وقومت شربت لتر مايه وأنا عارف إني لو شربت هموت، وقولت يارب أنت منعتني من حاجات كتير اوي وأنا عبدك وعطشان، مش هبقى زعلان لو عايز تاخدني، وبقيت قاعد مستني إن السر الإلهي يطلع، ومكنش حد معايا، وبعدين قومت طلبت شوربة، بما الإنسان طماع، وعدى نص ساعة والدكتور دخل الأوضة شاف المايه والشوربة قدامي وسألني أكلت وشربت؟ قولتله آه، قالي مبروك أنت خفيت.
سبب وفاة طلعت زكريا
وأصيب طلعت زكريا بالتهاب في أحد شرايين المخ ما أدى إلى إصابته بغيبوبة عام 2007، ولكن تعافى بعدها وقدم فيلم طباخ الريس الذي حقق نجاحًا باهرًا، وقدم بعدها العديد من الأعمال التي كانت نالت إعجاب الجمهور، إلى أن توفي الفنان الراحل طلعت زكريا نتيجة إصابته بالتهاب رئوي حاد، وتم نقله لأحد مستشفيات السادس من أكتوبر ودخل العناية المركزة أربعة أيام، ومن ثم رحل عن عالمنا في مثل هذا اليوم قبل أربعة سنوات.
شائعات حول سبب وفاة طلعت زكريا
وانتشرت مؤخرًا شائعات حول سبب وفاة طلعت زكريا، وأشار عدد من رواد مواقع التواصل الاجتماعي إلى أنه توفي بطريقة عمدية من صديق له، مستعينين بالذكاء الاصطناعي، ولكن ردت إيمي طلعت زكريا ابنة الراحل خلال تصريحات خاصة سابقة لـ القاهرة 24، حول ما تم تداوله، قائلةً: الذكاء الاصطناعي ده كارثة، وأنا حاسة إنه مؤامرة على الفن المصري والفنانين إحنا لازم نعرف مين ورا ده، وأنا قدمت بلاغ من فترة في إحدى الصفحات اللي استخدمت صوت بابا وقالوا إنه مات مقتول على إيد صديقه، ومعايا رقم المحضر وماشية في الإجراءات.
مَن هو طلعت زكريا؟
طلعت زكريا محمد يوسف، تخرج في قسم التمثيل والإخراج من المعهد العالي للفنون المسرحية عام 1984، وبدأ مشواره الفني من خلال مسرحية الشخص عام 1982، وقدم العديد من الأعمال المسرحية والتليفزيونية، ولمع بريقه في الأعمال الكوميدية، ليصبح رصيده الفني متخطي 170 عملًا ما بين التليفزيون والسينما والمسرح، أبرزهم: فيلم طباخ الريس، فيلم السيد أبو العربي، فيلم حريم كريم، وغيرها من الأعمال.
