انهارنا نفسيًا عند الكتابة وميجيش ربع الواقع.. عبادة نجيب مؤلفة ورق التوت تكشف عن صعوباته
تحدثت المؤلفة عبادة نجيب عن صعوبات كتابة مسلسل ورق التوت بطولة الفنان شريف سلامة، وعن القضايا التي يناقشها المسلسل وقربها من الواقع اليومي الذي يعيشه جزء من الجمهور.
وقالت عبادة نجيب في تصريحات خاصة لـ القاهرة 24: شخصية سامية ـ ثراء جبيل قريبة مني في الحقيقة هي وشخصية مروان ـ شريف سلامة، وكل القصص التي تناقش في المسلسل حقيقية ومن الواقع، موضحة: الحكايات اللي في المسلسل متجيش ربع اللي بيحصل في الواقع.
وأضافت عبادة: إحنا عندنا 80 % من الناس تحت مستوى الفقر مش بس مستوى فقر، ولكن فقر تعليم وفقر كرامة.. والعمل عن ناس أنا شوفتها في الحقيقة لمدة سنين.
وعن إطار المسلسل وفكرته، أوضحت عبادة: آدم وحواء أول ما أخطؤوا غطوا “سوآتهما” ده اللي مكتوب في القرآن، ولكني أخذت الإلهام إن احنا لما بنوعي بـ أخطائنا والحاجات اللي حاسين بيها بالخجل أو بالعار أو خايفين نطلعها بنداري عليها.. مش هنعرف نتعامل مع الآخرين ونفسنا إلا لما نواجه الأخطاء دي ونطلعها على السطح.. ومروان ـ شريف سلامة بيحاول يخليهم يشيلوا ورق التوت اللي بيداروا بيه عيوبهم عشان يكونوا بني آدمين حقيقيين، المسلسل بيناقش إزاي بنواجه نفسنا.
عبادة نجيب: انهارنا نفسيا وقت كتابة ورق التوت.. وبنات بتشتغل عندها 8 سنين لهذا السبب
وعن صعوبات كتابة العمل، أوضحت عبادة: انهارنا نفسيًا واحنا بنكتب مسلسل ورق التوت، لأنها كلها قصص حقيقية.. وكنت عايزه أعبر عن الواقع وحاولت أقدم ده.
وعن قضية العنف الأسري الذي يناقشها المسلسل، قالت عبادة: كان في بنات بتشتغل عندها 8 سنين عشان تصرف على إخواتها الولاد، وقصة سامية ـ ثراء جبيل فيها تطورات هتحصل في الحلقات الجاية.
وعن إمكانية تقديم جزء ثانٍ من ورق التوت، استكملت عبادة حديثها: فيه كلام عن جزء تاني من مسلسل ورق التوت، ولكن حتى الآن مفيش حاجة أكيده، ولكن نوعية المسلسل تتحمل جزء تاني.
وعن أعمالها المقبلة التي تحضر لها، اختتمت عبادة نجيب حديثها: عندي فيلم طويل هيكون من تأليفي وإخراجي وتدور أحداثه حول المجتمع الريفي، وبطلة العمل هيكون عندها 16 سنة، وأيضًا أحضر لعملين في الدراما التليفزيونية، ومنهم عمل في مرحلة الكتابة.
