ناردين فرج تكشف سر تسريب كواليس قتل عصام الصياد في صوت وصورة

كشفت الفنانة ناردين فرج، سر تسريب مشاهد من كواليس مسلسل صوت وصورة، التي أثارت الجدل حول هوية القاتل الحقيقي لشخصية عصام الصياد.

وقالت ناردين فرج، في حوارها مع القاهرة 24: فكرة الصور وفيديوهات قتل أبطال المسلسل لعصام الصياد، كانت فكرة المخرج محمود عبد التواب، قبل ما نخلص تصوير بـ أسبوع قالنا عايز أعمل حاجة نثير بيها الجدل، وكانت حاجة تشد وتلخبط المشاهدين مش أكتر.

كما كشفت ناردين فرج، تفاصيل تحضيراتها لشخصية المحامية ماجدة علوان، خلال أحداث مسلسل صوت وصورة، قائلة: لما قعدت مع المخرج محمود عبد التواب (توبة)، قالي اتفرجتي على مسلسل the undoing؟ ده مسلسل 7 حلقات بتاع نيكول كيدمان وهيو غرانت، وسألني على شخصية المحامية في المسلسل وأنا مكنتش فكراها، قالي اتفرجي عليها تاني، الست دي كانت بتدافع عن هيو غرانت اللي خان مراته مع واحدة واتقتلت وشكوا فيه أن هو اللي قتلها، وهي كل همها تطلعه بريء حتى لو شاكة فيه، وقالي شوفي الست دي معندهاش قلب إزاي، وأنا خدت منها ستايل اللبس وحسيت أن ده بيدي شكل القوة.

وأضافت نادرين فرج: أنا حبيت إني أغير من شكلي كممثلة وأنا بعمل شعري كده في الصيف، وفي الأول قعدت مع المخرج كان عايزها شخصية صارمة وجامدة ومفيش عندها قلب، ولاقيت إن لما أعمل شعري كده ده هيبين ملامح الوش أكتر وهيضيف للشخصية وشكلها.

أبطال مسلسل صوت وصورة

مسلسل صوت وصورة حقق نجاحا كبيرا منذ عرض أولى حلقاته، والعمل من بطولة حنان مطاوع، صدقي صخر، عمرو وهبة، ناردين فرج، مراد مكرم، وليد فواز، نجلاء بدر، فدوى عابد ومن تأليف محمد سليمان عبد المالك، وإخراج محمود عبد التواب.