أحمد ماهر: الفن أفسد حياتي.. وأبويا أقسم إنه يطلق أمي لو مثلت
تحدث الفنان أحمد ماهر عن أسوء الأوقات التي مر بها منذ بدايته في مجال التمثيل، ورفض والده المتكرر طوال فترة بدايته.
وقال أحمد ماهر عن الصعوبات التي مر بها في بدايته خلال حواره مع القاهرة 24: أنا في الوقت ده كنت بمشي أكلم ربنا في الشارع، لأن عشقي لهذا الفن، أفسد حياتي وخلاني أقعد 4 سنين مش عارف آخد الثانوية العامة، أنا كنت رئيس فرقة تمثيل ودايمًا داخلين المسابقة ومهم ناخد الكاس وأنا كنت رئيس الفرقة، فكنت أنا اللي بجيب الديكورات وأنا اللي أروح أتعاقد على المسرح وكل حاجة كانت عليا، وفي دماغي هذا الهوس والعشق الفني.
وأردف أحمد ماهر: لما كنت آجي أذاكر في البيت أقرأ أول كلمة وفجأة الصفحة تتلاشى وأشوف المسرح وأشوفني وأقف وأقول الشخصيات اللي بعملها والصالة بتشتعل إعجاب، أفوق ألاقي كوباية الشاي اللي أمي عاملهالي بقت تلج وعدى أكتر من ساعة فبالتالي كل سنة أسقط آجي البيت وأقولهم النتيجة فأمي تقولي حرام عليك أبوك بيخش التواليت بيجيب دم الراجل حزين على إنه مش عارف يربي، وابنه الكبير مش عارف ياخد الشهادة وبقية الولاد في العيلة أخدوها.
تصريحات أحمد ماهر
وأضاف أحمد ماهر: إلى أن أكرمني ربنا وأخدت الثانوية العامة، أنا بكل الحلم عاوز أروح أقدم للأكاديمية بقى عشان أخش وأدرس الدراسة اللي بعشقها، فروحت قدمت فوجئت إن هما بيقولولي موقفك من التجنيد إيه؟ يعني إيه؟ أنا مطلوب من التجنيد مش هنسى يوميها إن اللي أخد مني الورق قالي لو جبت التأجيل هنقبل ورقك مجبتوش انسى إنك قدمت ولقيت قدامي يومين بس.
واستكمل أحمد ماهر: بقيت مش عارف أعمل إيه وأبويا أقسم إنه لو عرف إني بمثل هيطلق أمي والبيت هينهار وهنتشرد يعني وهو شايف إن أنا لازم أحقق رغبته يا أبقى مهندس يا أبقى دكتور وأنا لا حابب ده ولا ده فأوهمته إني بلبيله رغبته بس اللي في دماغي في دماغي وأبويا ده هيعيشلي.
وأضاف أحمد ماهر: بس الحمد لله أخدت التأجيل في الآخر وطبعًا دخلت ودرست بس دون أن يعلم أبي إلى أن تخرجت، وفي يوم، اللي بيشتغلوا معاه قالوله يا حج ابنك صورته طالعة في جورنال قال ليه عمل إيه، تخيل إني عامل جناية قالوله لا ده عامل سهره تليفزيونية، جه البيت وقالي أنت بتمثل قولته اه قالي مش أنا حالف قولتله طلقها أنا هصرف عليها أنا حاليا متعين في الوزارة مش عاوز تصرف على البيت أنا هصرف على البيت قالي يعني مشيت اللي في دماغك.
