بسنت شوقي: الفن طاقة ربنا خلقها داخل الفنان.. وأنا مش جاية أصلح الكون
تحدثت الفنانة بسنت شوقي، عن مفهوم الفن من وجهة نظرها، وهل يجب على الفنان تقديم رسالة من خلال عمل فني أم لا.
وقالت بسنت شوقي، في لقائها مع القاهرة 24: أنا مؤمنة إن الفن طاقة ربنا خلقها جوه الفنان، سواء تمثيل أو غُنا أو النحت أو الرسم، مفيش حد بيرسم لوحة معينة علشان يوصل رسالة، الفن ده فطرة ربنا خلقها جوا الواحد وبتطلعيها والناس بتشوف نفسها فيها، يمكن رسالة الفن إن الناس كلها تحس أنهم واحدة وكلنا نفس الوجع ونفس الفرح.
وتابعت بسنت شوقي: إحنا ربنا خلقنا كلنا واحد وهي دي يمكن رسالة الفن في المطلق التواصل، أنا مش بدري دروس في الأخلاق، وأنا مش جاية أصلح الكون.
بسنت شوقي تعلق على انتقاد استمرار عمل الفنانين في ظل أحداث غزة
وسبق وأن علقت الفنانة بسنت شوقي، على انتقادات استمرار عمل الفنانين في ظل أحداث غزة، قائلة: محدش مشتغلش، أنا مينفعش أكون ماضية عقد ومشتغلش، الحزن في القلب وحتى لو بعد الشر لو حد قريب منك توفى مش هتوقفي الشغل بتاعك، الموضوع كبير وأنا ماضية عقد وفي بيوت مفتوحة.
وأضافت: المشكلة إن الناس شايفة إن الممثلين بيعملوا حاجة للترفيه ومحدش بيقول لأي شغل تاني ميعملش شغله، أنا بحس إن الحزن موجود والناس بتعمل اللي تقدر عليه، لو نفسيًا مش قادرة تمام كل واحد حر، أنا لازم أشتغل أنا ماضية عقد ومش هينفع أوقف تصوير بعد ما صورت.
