عمر كمال: جيت من السويس للعجوزة بـ 20 جنيه عشان أحضر حفل لليثي.. وبعد 7 سنين ربنا كرمني| فيديو

كشف المطرب عمر كمال، خلال ندوته بالقاهرة 24، بعد نجاح أغنيته " أخوك يشرف بلد " مع المطرب محمود الليثي، عن محطات من حياته قبل الشهرة وظهوره للجمهور، وأسباب حبه للفنان محمود الليثي.

عمر كمال جيت من السويس للعجوزة عشان أحضر حفلة لليثي 

وقال المطرب عمر كمال، في سنة 2015 كان معايا 20 جنيه بس في جيبي وأنا ساكن في السويس والفنان محمود الليثي كان عامل حفلة في مكان في العجوزة ركبت من عندنا للسلام وأتبقي معايا 10 جنيه بالضبط وروحت مكان الحفلة وكنت فاكر أنه هيجي الساعة 9 أو 10، وقعدت أستنيته لحد الساعة 4 وكان الجو برد جدا وقتها.

واستكمل عمر كمال قائلًا: لما جه قالي تعالي وخدني واحتضني وقتها وقالي أنت ربنا هيكرمك، وعشان كده هو ليه معزة كبيرة في قلبي، وفي سنة 2015 كان ده حالي ودلوقتي بعد 8 سنين أنا قاعد جمب النجم الكبير محمود الليثي اللي أنا بعشقه.

وأردف عمر كمال، استحالة أبص لحد بعد كرم ربنا ليا، وأنا دلوقتي راكب أحسن حاجة وعايش أحسن عيشة، ومتأكد أن كل واحد ليه معاده لأني أوقات بقعد بالأسابيع مفيش ولا أوردر وأوقات بيبقي 4 أوردرات في اليوم وسفر برا وسافرت أمريكا وأوروبا ولفيت الوطن العربي كله، وعارف أني رزقي هاخده، فعمري ما أقارن نفسي بحد وزي ما بيقولوا متقارنش موسم زراعتك بموسم حصاد الأخرين.