مرتكب جريمة عين شمس في التحقيقات: قتلته وندمان |خاص
يواصل القاهرة 24 نشر التحقيقات في القضية رقم 15502 لسنة 2023 والمعروفة إعلامية بـ جريمة عين شمس، المتهم فيها مصطفى. أ بإنهاء حياة المجني عليه صابر علاء صابر، وسط الشارع؛ لخلافات سابقة بينهما.
ووفقا للتحقيقات، لطم المتهم الضحية على وجهه لدفاعه عن صاحب العمل الخاص به، بعدما كان يسير برفقة والدته وأهانه، وتربص به وطعنه عدة طعنات بسلاح أبيض حتى أنهى حياته.
أقوال المتهم في جريمة عين شمس
وقال المتهم أمام جهات التحقيق: في خلافات سابقة بيني وبينه وكان معدى من قدام الفرشه من فتره هو وامه، و(زين) صاحب الفرش اللى انا شغال عليه شدها وفراح شد معاه في الكلام وقاله انا اللى عايزنى يجيلى، فأمه خدته وودته لزين فشد معاه في الكلام وانا حسيت انهم ممكن يضربوا بعض فروحت ماسك صابر وبشده علشان ابعده راح ماسك فيا انا كمان روحت ضاربه بالقلم، وأمه خادته ومشيت وجه ابوه وقعدنا واتصالحنا والموضوع خلص، لكن هو من يومها وهو حاططنى في دماغه وكل ما يعدى من قدام الفرش يقعد يشتمني ويقولى انا هعرفك.
وأضاف المتهم بجريمة عين شمس: كان معدى هو واتنين أصحابه من قدام الفرش وشتمونى ومشيوا، فانا روحت للناس اللي صابر شغال معاهم علشان اشتكيلهم، بس وانا راجع قابلتهم تاني بالصدفه وحصل اللي حصل هو كان معاه اثنين أصحابه معرفش أسمائهم بس هما كمان قعدوا يشتموا.
جريمة عين شمس
وواصل المتهم أمام جهات التحقيق: كان معايا مطواه قرن غزال اشتريتها من واحد من حوالى سنتين بس معرفش اسمه والمطوة بتبقى معايا بس وانا شغال على الفرش، لكن لما يروح بسيبها وبنزلش بيها، وبشيلها معايا علشان بيبقى معايا فلوس الشغل وبخاف حد يسبتني.
وتابع: كنت عايز أهوشه علشان لقيت الواد اللى كان ماشي معاه بيعمل انه بيطلع حاجه من جنبه علشان هو وقف قدامى وفضل يشتمنى وأول ما شوفته هو والاتنين اللى معاه ولقيت صاحبه بيطلع حاجه من جنبه روحت مطلع المطوه ومسكت صابر وقعدت أقوله عيب اللي انت بتعمله معايا انا زى ابوك ومينفعش تشتمنى في الرايحه والجايه، فبرده فضل يشتمنى، فأنا قعدت أضربه بضهر المطوه على دماغه علشان أخوفه، راح عضدنى من صدرى، فأنا فضلت أضربه في بطنه علشان يسيبني وقتلته وندمان عليه.
