حسن أبو الروس: كاملة أبو ذكري اللي اكتشفتني.. وكنت بتحايل على المخرجين يدوني مشهد أو اتنين|فيديو
تحدث الفنان حسن أبو الروس عن بداية مشوراه الفني في التمثيل، مشيرًا إلى أنه عانى كثيرًا وواجه صعوبات حيث بدأ منذ 20 عامًا ولم يسمع أحد عنه سوى بعد ظهوره في مسلسل بـ 100 وش ومن ثم توبة وأخيرًَا مسلسل حالة خاصة.
وقال حسن أبو الروس خلال ندوة تكريمه في موقع القاهرة 24: فخور أني ربنا خلاني أبدأ الشغلانة من تحت جدًا، وبدأت التمثيل بمشهد أو اتنين، وكنت بتحايل على المنتجين والمخرجين عشان يدوني مشهد أو اتنين.
وأضاف حسن أبو الروس: وكان حظي حلو أن الناس اللي روحت لهم كاستينج واشتغلت معاهم زي محمد خان عملت معاه تلات مشاهد في فيلم قبل زحمة الصيف، ويسري نصر الله عملت معاه مشهد في الماء والخضرة والوجه الحسن واللي من خلاله اتعرفت على باسم سمرة، وقعدت 20 سنة لحد ما اكتشفتني كاملة أبو ذكري والناس شافتني في بـ100 وش وبعدها توبة وحالة خاصة.
وأضاف حسن أبو الروس: كنت شغال في فرقة مسرح لمدة 7 سنين مع حسن الجريتلي وكنت بلف العالم معاه وكان معايا وقتها عارفة عبد الرسول وسيد رجب، وأنا فرحان أني عديت بده، وعمري ما كنت هوصل أني أعمل دور بـ 100 وش واخد ثقة كاملة أبو ذكري غير لو عديت بكل ده.
عيلتي كانت رافضة التمثيل
وعن الصعوبات التي واجهته في التمثيل أيضًا قال حسن أبو الروس: عيلتي كانت رافضة التمثيل، وأمي كانت شايفة فيا حاجة لكنهم معذورين شايفني بقالي كتير ومفيش حاجة بتحصل، لكن مستقبلي كان في قلبي وكنت حاسس أني هوصل.
وأكمل أبو الروس: أنا بستمتع بالشغل حتى لو مش باخد أجر يعيشني هفضل أعمله لأن الاستمرارية بتولد النجاح وكان معايا دفعتي في الورشة اللي كنت فيها وفي كتير بطلوا لأنهم كانوا حابين الوصول مش الشغلانة نفسها أو الممارسة لكن أنا بحب الشغلانة وبحب أعمل حفلات حتى لو مش بيجي جمهور كبير.
وواصل أبو الروس: في بدايتي كنت بشتغل في الإعلانات علشان أصرف على نفسي وألفت إعلانات كتير زي إعلان محمد هنيدي أنا واد خلاصة، وكنت بألف أغاني الإعلانات والسيناريو ولحد دلوقتي مستمر في الإعلانات.
