قس يوزع البلح على الصائمين في الشارع: عايزين نبقى على قلب رجل واحد.. ومعلق فانوس في بيتي| فيديو
في موقف تملؤه الوحدة والوطنية، حرص القس دوماديوس على إفطار الصائمين المسلمين، حيث وزع على المارة في الشوارع التمور والفاكهة قبل أذان المغرب، لتهنئهم بحلول شهر رمضان.
قس يوزع البلح على الصائمين في الشارع
وقال القس دوماديوس لـ القاهرة 24: كل سنة وانتم طيبين رمضان كريم عليكم ربنا يتقبل صيامنا مصر كلها صائمة، نادرا ما يحدث هذا ربنا عايزنا نبقى على قلب رجل واحد، ونتحد لمساعدة أهل غزة، في شباب بيقول أنا كرهت حياتي بس إحنا عايزين نقول في أمل.
وأشار القس دوماديوس: اللى ربنا يبعته بوزعه، دي حاجة بسيطة بوزعها مش برتب الأمور، وأول مرة أبدأ كنت في دير ومعاي نعناع، لفيت على الناس وزعت النعناع، فضل الناس تقول أبونا اللي إدانا النعناع أهو على الرغم من أنه عود نعناع واحد، فعرفت إن الإنسان يحب الهدية مهما كانت صغيرة.
وتابع القس دوماديوس: حبيت أشارك المسلمين في الاحتفال ده وأنا في البيت عندي معلق فانوس، والمصريون هم الشعب اللي بيحتفل مع بعضه ده عشان شعب طيب ولا عمره احتل حد، الشعب المصري شعب مسالم ولا بيحارب حد ولا بيعتدي على حد.
وأوضح القس دوماديوس: التاريخ المصري والأصول والحضارة هي اللي خلت الشعب المصري مسالم، الشعب مصري واعي بيعرف حقوقه كويس، وشعب صابور وشاكر لربنا، علشان كده ربنا بيكرمه، ودايما في وحدة ومترابطين.
