نجوى فؤاد تعلق على معاناتها صحيا وماديا: مفيش مصدر دخل وبصرف من اللحم الحي | خاص

أعربت الفنانة نجوى فؤاد، عن حزنها الشديد بعد تدهور حالتها الصحية والمادية، مطالبة وزارة الثقافة بالاهتمام بفنانين الزمن الجميل، معلقة: أنهم من جعلوا الفن المصري في الريادة.

وقالت نجوى فؤاد في حوارها مع القاهرة 24: لما جيت أطلع معاش من النقابة لاقيته 600 و700 جنيه في الشهر، وكيلو اللحمة بـ 500 جنيه، نعيش بيهم ازاي ولا نعمل أيه، دا إحنا التراث الفني بتاع مصر.

وأضافت نجوى فؤاد: أنا وعبد الحليم حافظ ونجوى فؤاد وسمية جمال ورشدي أباظة وفريد شوقي، وأم كلثوم، الناس دي اللي عملت الفن في مصر، احنا أساس الفن، أخدنا ملاليم وهما دلوقتي بياخدوا الملايين.

نجوى فؤاد تطلب من وزارة الثقافة الاهتمام بالفنانين القدماء

وطالبت نجوى فؤاد وزارة الثقافة الاهتمام بقدماء الفنانين في ظل غلاء الأسعار، إذ قالت: المفروض وزارة الثقافة تهتم بالفنانين الدنيا بقت غلاء رهيب جدا لو صرفنا يوم ولا اتنين طيب التالت نجيب منين.

وتابعت: الجيل الجديد بيعمل مطاعم ومشاريع جمب شغله لأنه بيكسب كتير بياخد أجور عالية إحنا كنا بناخد الـ 5000 ولا 2000 ولا 3000 ولا أقصى أجر وصلتله كان 8000، ميكفيش يصرف على البيت حاجة.

وكشفت نجوى فؤاد عن مصدر دخلها قائلة: مفيش مصدر دخل، بصرف من اللحم الحي من اللي ربنا بيبعتهولي من عنده.

وعن سؤالها عن الأشخاص الذين يساعدونها ماديًا، عقبت: مفيش داعي للكلام لأنها حاجات بتتعبني نفسيا لو قولتها.

كما تحدثت الفنانة نجوى فؤاد عن دور نقابة الممثلين، موضحة: عاملين لينا كارنيه للتحاليل والإشاعات، يعني لو الإشاعة بتكلف 3000 جنيه يدفعوا هما منهم مثلا 700 أو 800 بالكتير 1000 بس هي دي اللي بتساعدنا فيها النقابة.

وعن النقيب أشرف زكي، قالت: أشرف زكي ملوش علاقة، أشرف ابن حلال وإنسان كويس جدا ومن أحسن من مسك منصب النقيب، لكن وزارة الثقافة لازم تهتم بالفنانين اللي مباقوش بيشتغلو ربع الأول وفي منهم مبيشتغلش خالص.

وختمت حديثها: أنا قاعدة في شقة على النيل وإيجار  بقالها 40 سنة، شيء مينطبقش على الحياة اللي عايشين فيها وظروف، شيء طبيعي لازم نتحملوا بس لو عندنا وبنقبض، اللي بيقبض كتير يدفع ضرايب لكن اللي مبيقبضش خالص يعمل أيه.

أشرف زكي ردًا على نجوى فؤاد: عمر النقابة ما تخلت عنها