فتحي أقدم بائع بوظة بالأقصر: الناس بتيجي من كل مكان على مدار 65 عامًا
ميحلاش رمضان غير ببوظة عم فتحي، جملة شهيرة يرددها أهالي مدينة الأقصر، فعلى مدار 65 عاما استطاع فتحي عبد الرحيم محجوب، صاحب الـ 86 عاما، أن يكون من علامات شهر رمضان المميزة التي يستبشر بها أهالي الأقصر.
أقدم بائع بوظة في الأقصر
وقال عم فتحي للقاهرة 24: الحمد لله على مدار 65 عاما الناس بتجيلي من كل أنحاء الأقصر ومن القرى المجاورة علشان تشتري البوظة بتاعتي، ومش بس كده، في ناس بتطلبها في بحري وببعتلهم.
وأضاف عم فتحي: سر حب الناس في البوظة بتاعتي على مدار السنين دي كلها هو الأمانة والإخلاص في الصنعة، لأني بعملها بدقيق فاخر وبضيف لها شعير وسكر.
بفتح في شهر رمضان بس
وواصل فتحي: قبل المغرب بنكون مخلصين كل الكميات اللي عملناها من البوظة، ومعايا 5 أولاد بيساعدوني وواقفين يبيعوا، وأحفادي كمان بعد ما اديتلهم كلهم سر المهنة.
وقال فتحي: أنا مش بفتح طول السنة غير في شهر واحد وهو شهر رمضان المبارك على مدار 65 عاما، علشان أشوق الناس للبوظة بتاعتي وده اللي خلاني من علامات الأقصر المميزة في شهر رمضان الكريم.
