ياسر فرج: قلت لربنا لو مقدر وفاة زوجتي خدها وراضينا.. استجاب دعواتي وبحس بيها معانا في البيت
كشف الفنان ياسر فرج، تفاصيل الأيام الأخيرة في حياة زوجته التي رحلت في السنوات الماضية إثر إصابتها بالسرطان، موضحًا أنه دعى الله بتعجيل وفاتها حتى لا تتألم أكثر، مؤكدًا أنه يشعر بها حوله طوال الوقت.
ياسر فرج: قلت لربنا لو مقدر وفاة زوجتي خدها وراضينا
وتحدث ياسر فرج عن فترة مرض زوجته الراحلة خلال حلولها ضيفا في برنامج لحظة تجلي الذي تقدمه الزميلة منى عقبي، حيث قال: زوجتي كانت حالتها بتسوء بالتدريج، ودعيت وقولت يا رب لو أنت مقدر وفاتها أنا راضي بس سهل المرحلة دي علينا وعلى الأولاد، من غير خسائر نفسية وربنا استجاب ليا بعدها بشهر.
وتابع ياسر فرج: بحبس بيها إنها في البيت، وبحلم بيها إنها معانا وممكن أبقى قاعد وولادي حواليا وأنا مش قادر أمسك دموعي، وأنا فعلًا عندي يقين كامل، في إن ربنا مش هيسيبني، وكانت حاسه قبل وفاتها ووصتني عالأولاد ومامتها..وأنا والأولاد بنروح نقرأ ليها قرآن وبسيب كل واحد يقف قدامها يتكلم معاها ويفضفض معاها وبيبقوا حاسين بيها.
وأضاف ياسر فرج: قبل وفاتها كنا متأهلين أنا والأولاد، إننا نستوعب فقدها وكانت صدمة كبيرة بس كانت قليلة بالنسبة لأنها كانت تموت فجأه وإحنا كنا مؤهلين.
وفي سياق آخر، تحدث ياسر فرج عن الحادث الذي غير حياته خلال تصريحاته مع القاهرة 24 إذا قال: خلال امتحانات تخرجي من المعهد، وكان عندي تصوير وقتها وكنت بخلص تصوير وأعمل بروفات على مشروع التخرج، فالواحد كان مبسوط أنه بيتخرج وشغال وبيعمل كذا حاجة في نفس الوقت والمعنويات كانت مرتفعة، وفي لحظة عملت حادثة غريبة جدًا وخبطت واحد كان بيجري من قدام العربية قضاء وقدر، وكل الأحاسيس اللي كانت عندي راحت، ولاقيت نفسي في نيابة وتحقيق والدنيا راحت في اتجاه تاني خالص.
وتابع: الحادثة دي دفعت فيها فلوس كتير جدًا وادينت بفلوس كتير جدًا وأنا لسة طالب، وكنت عامل مسلسل اسمه أهل الدنيا بطولة صلاح السعدني، وكان أهم دور عملته في حياتي لغاية النهاردة، وكنت منتظر أنه ينزل وكمان كنت داخل الجيش، يعني أي حد هيحتاجني في شغل أو صحافة مش هبقى موجود والناس هينسوني، وكمان محتاج أشتغل علشان أسدد ديوني.
