إيناس الدغيدي لـ أميرة بدر: أنا من المخرجين أصحاب الفكر وطول عمري عندي قضية بدافع عنها

علقت المخرجة إيناس الدغيدي عن غيابها لمدة 14 عامًا عن الإخراج، ورأيها في الفنانة منى زكي كممثلة، وكذلك المخرجين التي تدربت معهم.

وقالت إيناس الدغيدي خلال برنامج أسرار التي تقدمه الإعلامية أمير بدر على قناة النهار: بقالي 14 سنة مشتغلتش واسمي موجود، وفيه مخرجين موجودين والناس متعرفهمش، والمخرجين أنواع، فيه اللي بينفذ وفي اللي عنده فكر، أنا من اللي عندهم فكرة، أنا طول عمري عندي قضية، طول عمري عندي قضية بدافع عنها، مش دفاعا عن المرأة بس، لكن علاقة الرجل بالمرأة، كل أفلامي كده، ثانيا أنا أول مخرجة يجيبني منتج يديني فلوس عشان أعمل فيلم، ويثق فيا أني أعمل فيلم بمحمود حميدة ونجلاء فتحي في عزهم.

وأضافت إيناس: عادل إمام خلي الناس تحبه وبعدين يشوفوا تطوراته، اشتغلت 45 فيلم مساعدة مع أكبر مخرجين، وكانت الصحافة تكتب عني وأنا مساعدة، مرة مفيد فوزي كتب عني وأنا مع حسين الإمام أنه دخل شاف شابة جميلة، فا اعتقدت أنها ضمن الممثلين وبعدين لقيتها مساعدة مخرج، لما بطلع في أي برنامج دايما أفكاري مش عاجبة الناس، ومبعرفش أقول اللي مش جوايا، ودايما أقول أن الجمال باب يخليكي تاخدي مميزات أكتر من غيرك، لكن بقول أن الست الذكية اللي متعتمدش على جمالها بس، والحتة دي خليتي جادة جدًا.

إيناس الدغيدي: شريف عرفة كان من المساعدين بتوعي.. ومنى زكي خدت كورسات تمثيل

واستكملت إيناس حديثها: مرة وأنا مساعدة مع عادل إمام في فيلم حب في الزنزانة، قالي أنا كنت فاكر بيجبوكي عشان بنت حلوة وخلاص بس طلعتي شاطرة أوي، وكنت عايزة أتمكن أوي من الشغلانة، وكل الفنانات دخلوا عشان الجمال، وياسمين صبري دخلت عشان جميلة، بس عايزة تتطور، أنا بحبها بس عاوزة مخرجين ومساعدين يساعدوها، ومنى زكي راحت خدت كورسات وهي ممثلة كبيرة، وهاني خليفة مخرج شاطر، ومن أنصار شريف عرفة لأنه كان المساعد بتاعي، وداوود عبد السيد، وكاملة هايلة، وشيرين عادل بشوفها أكتر في المسلسلات، المسلسل بشوفها لربات البيوت، وأنا مش إيقاعي المسلسلات الحكاية اللي بحكيها في ساعتين هما بيحكوها في 30 ساعة زي قصة إحسان عبد القدوس.

برنامج أسرار

برنامج أسرار تقدمه الإعلامية أميرة بدر على شاشة النهار يوميًا خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.