البلوجر محمد فرج يرد على الهجوم عليه بعد إعلان ليبتون: أنا جبلة والناس كده كده بتتكلم
نشر البلوجر محمد فرج، منشورًا جديدًا له عبر حسابه الشخصي بموقع إنستجرام، يرد من خلاله على الهجوم عليه بعد مشاركته في إعلان ليبتون.
وقال محمد فرج، عارف إنه الموضوع يثير الجدل وكالعادة الناس تهاجمني، بس أنا جبلة متتعبوش نفسكم، من أول ما بدأت سوشيال ميديا وأنا ساعات بصحى من النوم ألاقي الناس بتهاجمني في حاجة حصلت، مع إن عمري ما أجبرت حد على يتابعني.
البلوجر محمد فرج يرد على الهجوم عليه بعد إعلان ليبتون
وأضاف البلوجر محمد فرج، اتعودت إن الناس في مصر بالذات عاطفية.. يحبوك ويطلعوا بك سابع سماء أو فجأة يكرهوك وينزلوك الأرض ويشتموك بأهلك.. عادي جدًا حلال لهم، الحمد لله بعد 8 سنين في السوشيال ميديا جالي مناعة وفهمت واقتنعت 100% إن الناس كده كده بتتكلم، فبقيت جبلة، ومهما اتقالي مش بسمع ولا بيفرق لي طالما أنا عارف أنا بعمل إيه وربنا بيحاسب في الأول والآخر مش الناس.
وتابع البلوجر محمد فرج، دائمًا الناس بتاخد فكرة عن البلوجر، إنه حد تافه بييجي له فلوس من الهواء، لا يفقه شيء والناس اللي بتحبه مدياله أكبر من حجمه، هما هما الناس دي لما تحصل مصيبة يروجوا له ويقولوا له انت شخص مشهور وعندك ناس ومسموع لو سمحت وصل للناس كذا لعالم بيسمع ويمشي وراك.
واستكمل فرج: دلوقتي بقى جه موضوع فلسطین والمقاطعة، أنا من بداية الحرب عمري ماتكلمت على المقاطعة، يعني مبدئي واحد من البداية، ومغيرش عشان الفلوس ولا الإعلانات، ماروحتش رفح والمعبر والكلام ده مش مزايدة وتوبيخ مني على اللي راحوا بالعكس، أنا كنت شايف إني أصغر من كل اللي بيحصل ووجودي هناك ملوش معنى ولا لازمة.
واختتم فرج، تحديد موقفي من المقاطعة اللي بردو مش هيفرق معاكوا في حاجة ولا يزودني حاجة ولا هيزودكوا، هي مجرد وجهة نظر لا أكثر ولا أقل، وكل واحد وضميره وكلنا بنعامل ربنا، ووجهة نظرك لا تعنيني في شيء ولا هحكم عليك ولا ليا الحق أصلا.
