نزيف الأسفلت.. حادث في منطقة وسط البلد يتسبب في وفاة طفلين وإصابة آخر بالشلل
لقي طفلان مصرعهما فيما أصيب طفل ثالث كان معهما، فجر اليوم، أثناء عبورهم الشارع، بمنطقة وسط البلد أمام دار القضاء العالي، حيث كانت السيارة تسير بسرعة عالية، حسبما أكد شهود عيان.
فيما فقد طفل ثالث النطق تمامًا، بعد رؤية الطفلين أمامه غارقين في دمائهما، بعد دهس عربة بها 3 سيدات وشاب للضحيتين.
وقالت “ر.ع” شاهدة عيان: “حادثة بشعة في منطقة وسط البلد أمام دار القضاء العالي، شفت عربية ملاكي فيها شاب و3 ستات واضح إنهم راجعين من سهرة، جاية بأقصى سرعة في اتجاه رمسيس، وبسبب السرعة الجنونية كان فيه 3 أطفال بيعدوا الشارع أكبرهم لا يتجاوز 11 أو 12 سنة، كانوا في منتصف الشارع تماما، ولحظهم الأسود العربية مقدرتش تفاديهم وطيرت اتنين مرة واحدة والتالت فلت بسبب حركته نص متر بالعافية في الاتجاه المعاكس”.
وأكدت: “الطفلين ماتوا في الحال بعد ما العربية فرمتهم والتالت صوّت مرة واحدة قال أخويا وبعد كده جاله شلل وصدمة وتوقف عن الكلام تماما… العربية اتقلبت باللي فيها بس مجراش ليهم حاجة… بس اتكسرت خمسين حتة والباقي منها دخل في دار القضاء وده الي خلى الشرطة توقفهم وتحتجزهم… الولاد قعدوا مرميين في الشارع فترة رغم إن مستشفى دار الهلال والسكة الحديد على بعد خطوات من مكان الحادث… الأخ التالت جاله صدمة عصبية ومبينطقش”.
وأضافت: “أنا كمان مصدومة المشهد صعب ولا يحتمل وشكل الطفلين وهما مفارقين الحياة ومتجمدين ومرمين على الأرض مش هقدر أنساه طول عمري”.
التفاصيل الكاملة لحادث دهس وسط البلد.. ومصير سائق السيارة (فيديو)
