الجمعة 29 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

أم حامل وزوجة لم تترك زوجها.. حكايات مواطنين أبلغتهم “الصحة” أنهم مصابون بكورونا

القاهرة 24
أخبار
الجمعة 13/مارس/2020 - 02:52 ص

نشر جلال الشيشيني معاون وزيرة الصحة ونائب رئيس حملة 100 مليون صحة، مواقف إنسانية غير معلنة، تجريها فرق وزارة الصحة والسكان أثناء إبلاغهم المواطنين بإصابتهم بفيروس كورونا الجديد.

وقال الشيشيني في تدوينة على صفحته على موقع التواصل الاجتماعي فيس بوك: “لأي حد بيسخر أو بيستخف من مجهود وزارة الصحة في التصدي لفيروس كورونا المستجد، مش هقولك تعالى شيل ربع احنا اللى احنا شايلنه، ولا حتى في ربع الظروف وأضعاف الإمكانيات دي، ولا حتى من غير ضغط وسخرية الناس منك ليل ونهار، ولا، ولا، ولا”.

وأضاف: “هقولك بس استحمل تمسك سماعة التليفون وتتصل بمواطن تبلغه نتيجة التحليل وتطلب منه يجهز في خلال ربع ساعه علشان يتنقل حالا لمستشفى العزل، علشان يتلقى الرعاية أولا ونمنع العدوى ثانيا، المكالمة مجهولة إنت مش عارف مين هيرد عليك ولا ظروفه الاجتماعية والنفسية عاملة إزاى، ولا هو أصلا مرعوب من هوس الإعلام، ولا واخد الموضوع هزار وقشطة”.

نقل ممرضة حميات إمبابة المصابة بفيروس كورونا إلى مستشفى الإسماعيلية

وأكمل: “أم سكتت لمدة 10 ثوانٍ وقالت لي بس والنبي في صمت مش عاوزة ولادي يتعرضوا للتنمر من الجيران، وأب قالي طيب خليني للصبح حتى أشبع من ولادي و(كأنه لا قدر الله بعد الشر مش هيشوفهم تاني)، وواحدة عرفت من المكالمة معاها إنها حامل، وطفل أمه صممت تتعزل معاه حتى لو هتتعدي، وزوجة ما خدهاش من حضن جوزها اللى هيتعزل غير الطاقم اللي مسئول عن نقله، واللى مسلم أمره لله ويرد يقولي طيب المستشفى فين وأنا أجيلكم أسهل..، واللى عاوز لاب توبه بس معاه علشان يخلص البيزنس بتاعه، والمصاب اللي سكت وقال حالا هنعزل، بس بالله عليكم بنتي سخنت إمبارح ابعتوا فريق يسحب عينة ويطمن عليها.. والزوج اللى كلمته 2 بليل صحى مراته يبلغها الخبر قلتله لأ ثانية واحدة، هي كمان إيجابي هتجهزوا وتنعزلوا سوا دلوقتي”.

وشدد: “رقم 80 حالة بتاع النهاردة مش رقم، ولا عدد، دول 80 أسرة و80 روح و80 قصة وحكاية و80 سيناريو وسبب عدوى مختلف ، اللي كان مسافر واللى من أخوه واللي من أبوه، واللى أكل عيشه من السياحة والتعامل مع الأجانب، هيعمل أيه ما لازم ينزل شغله ويسافر كل شوية واللى واللى، الطف بيهم يارب من المرض والظروف، والطف بيهم من تنمر الناس حواليهم، وهون على كل أسرة منهم غياب فرد لمدة 14 يوم أم ولّا أب ولّا ابن”.

وأضاف: “محدش يستهون باللي بتقوله ونعيده، اغسلوا أيديكم كل شوية، وكافحوا العدوى من العطس والكحة ، الأب اللي عدى ابنه كان بيعطس عادى على فكرة وبيهزر وبيألش برضه زينا عادي، وميعرفش أنه مصاب ولا أنه اتسبب في عدوى لابنه، حافظوا على نفسكم علشان ربنا يحافظ علينا كلنا، صحتنا مسؤوليتنا كلنا مش مسؤلية دولة ولا وزارة بس، أكبر الدول اتهزت من فيروس أصغر من حبة السكر ، المرض مالوش كبير والدولة والوزارة هي احنا برضه على فكرة مش مستوردين من برا”.

وأردف: “بدل ما تنزل صورة سخرية وتهزيق في وزارة الصحة ، نزل صور غسيل الأيدي، ومكافحة العدوى، نزل معلومات عن الارشادات والعزل المنزلي لو لا قدر الله اختلطت بحد إيجابي أو حتى عنده أعراض الإنفلونزا، اهو منها علم وصدقة، ومنها بتساعد في نشر الوعي والتوعية، ومنها بتشجعنا وتقوينا أننا مش لوحدنا وفي ضهرنا شعب بيحافظ على بلده ، زي ما المسؤولين في بلده بيسهروا بالأيام والليالي يحموك ويحافظوا على صحتك”.

نقل مصري وزوجته الإيطالية لمستشفى العزل بعد إصابتهما بفيروس كورونا (القصة الكاملة)

وأضاف: “صفحة الوزارة وصفحة منظمة الصحة في مصر فيهم مواد غنية أقروها واحفظوها والخط الساخن 105/24 ساعة هيستقبل استفسارات وبلاغات، في ظل اليوم اللى البلد كلها إجازة مفيش موظف واحد من الفرق دي اخد إجازة علشان مستخسر يكون في أيديه حاجة يعملها علشان ميزدوش حالة واحدة، احفظنا كلنا يارب، وطمن أهل الـ80 أسرة دول، وارحم السيدة إلى اتوفت النهاردة وصبر أهلها ورجع باقي الناس لأسرهم وحياتهم سالمين متعافين يارب”.

تابع مواقعنا