مؤلف “واكلينها والعة” يشيد بالمخرجة كاملة أبو ذكري في تجربة مسلسل بـ100 وش (صورة)
أشاد السيناريست تامر عبد الحميد، مؤلف مسلسل “واكلينها والعة – سبع صنايع”، بالمخرجة كاملة أبو ذكري في إخراج مسلسل بـ 100 وش الذي يتم عرضه خلال ماراثون رمضان الحالي 2020، وكشف أسباب نجاحه، كما روى تفاصيل عمل كوميدي جمعه مع كاملة أبو ذكري في عام 2009 وهو ست كوم يحمل اسم “6 ميدان التحرير”، وذلك عبر حسابه الشخصي بموقع التواصل الاجتماعي فيس بوك.
وكتب المؤلف، قائلا: “تجربة كاملة أبو ذكري مع الكوميديا (مع تحفظي طبعا على تصنيف مسلسل “بـ 100 وش” كمسلسل كوميدي) مش تجربة جديدة، والحقيقة إن عندها وجهة نظر و(ستايل) مميز وتفضيلات في الكوميديا كانت واضحة من زمان”.
وأضاف المؤلف: “سنة 2009 اشتغلت مع كاملة أبو ذكري كأحد أعضاء ورشة كتابة سيت كوم “6 ميدان التحرير”، وكانت كاملة لما بتعمل بروفات في البلاتوه مع الممثلين بتفكر في كل العناصر عشان تحقق التصور الكوميدي اللي عندها، وما بتكتفيش بالاعتماد على أداء الممثلين أو مجرد “تصوير” الموقف الكوميدي”.
وتابع المؤلف: “فاكر مرة إن أحد الممثلين حب يجود و”يبالغ” شوية في الأداء ويرمي كام إفيه من عنده على اعتبار إنه مسلسل كوميدي وكده، فكاملة انفعلت جدا وقالت إنها ما بتحبش النوع ده من الكوميديا وبتشوفه رخيص، وكانت قادرة تسيطر على اللوكيشن وترسم كل شيء بدقة وتنفذه زي ما خططتله”.
وأوضح: “الدقة دي بتنعكس على طريقة التصوير والمونتاج واختيار وتوجيه الممثلين وباقي العناصر وصولا إلى أغنية التتر، وبما إن أغنية التتر في “بـ 100 وش” من أكتر الحاجات اللي الناس مرتبطة بيها دلوقتي، فـ دي فرصة مناسبة أتكلم عن أغنية تتر “6 ميدان التحرير” (أو الأغنيتين بقى، تتر البداية وتتر النهاية)، عشان أوضَّح إن نجاح أغنية تتر “بـ 100 وش” ده مش مجرد صدفة، وإن كاملة عارفة هي بتعمل إيه كويس”.
وأردف المؤلف: “المخرجة هالة خليل (اللي كانت في المشروع ده منتجة لـ6 ميدان التحرير) طلبت مني أكتب أغنية التتر، وكتبت كذا نسخة وكنا بنتناقش أنا وهي وكاملة في الكلمات لحد ما وصلنا للنسخة النهائية، كاملة كان عندها تصور إن الأغنية دي يلحنها “حسن إش إش”، وفضِلت لفترة طويلة أتردد ع الاستوديو بتاعه ونجرب ألحان وكاملة تقول ملاحظات”.
وتابع: “في الآخر ما حصلش نصيب وما وصلناش لنتيجة ترضي جميع الأطراف، واللي لحن الأغنية هو صديقي “وئام إسماعيل”، وغناها المطرب القوي “أسامة الخولي”، لكن فيه هنا ملحوظة مهمة: كاملة عايزة أغنية التتر تبقى أغنية شعبية، وبتعمل ده كاختيار واعي، وبتتعامل معاها مش بس كجزء مكمل للعمل، لكن باعتبارها جزء مهم من جهة، وعمل فني مستقل بذاته من جهة أخرى، لإنها فاهمة إن الجمهور بيرتبط بأغنية التتر، وبالتالي بالمسلسل نفسه، وإنها لما تتلحن بالطريقة دي هتنتشر أكتر، والأغنية فعلا حققت ده لما وئام عمل اللحنين اللي فيهم العناصر اللي بتدور عليهم كاملة، والأغنية بقى ليها “شعبية”.
واختتم السيناريست حديث قائلا: “الكوميديا مش بس خفة دم.. الكوميديا ذكاء ووعي وإخلاص وشغل كتير”.
يشار إلى أن السيناريست تامر عبد الحميد، يشارك في ماراثون رمضان الحالي 2020، بمسلسل”واكلينها والعة- سبع صنايع”، الذي يتم عرضه عبر شاشة قناة النهار بعدما تم عرضه خلال الفترة الماضية عبر إحدى المنصات الإلكترونية، تدور أحداثه في إطار حلقات متصلة منفصلة في قالب كوميدي يشارك في بطولته نخبة من الفنانيين، منهم مي سليم وشريف رمزي ومي كساب ومحمد ثروت.
مسلسل بـ100 وش الحلقة 15.. آسر ياسين ونيللى كريم ينجحان في عملية نصب جديدة
تفاصيل مشاهدة مسلسل بـ100 وش الحلقة 12 بطولة نيللي كريم وآسر ياسين في رمضان 2020
