حسن شاكوش بعد تحرير محضر ضده بسبب “jetski” في الساحل: “عايز يعمل نمرة”
حرر المهندس إسلام عز العرب محضرًا إداريًا بقسم مارينا يحمل رقم 1078، ضد مطرب المهرجانات الشهير حسن شاكوش، ليتهمه بإتلاف موتور “jetski”، كان قد طلب ارتياده من صاحبه ليتلقط صورة تذكارية، ولكنه أساء استخدامه بسبب عدم خبرته في قيادته بالبحر، ثم انقلب به وصعد عليه خوفًا من الغرق، مما أدى إلى احتراق الموتور الخاص به.
ومن جانبه أكد حسن شاكوش في تصريح خاص لـ”القاهرة 24″، إنه لم يتلف الـ”jetski”، كما قال صاحبه إسلام عز العرب، قائلًا: “أنا مبوظتش حاجه، مش أنا أصلا إللي اتأجرته ده كان حد صاحبي وأخدني وراه لفه كده في البحر، وصاحب الجيت سكي حابب يعمل نمرة مش أكتر، ولو كان احترق زي ما بيقول إزاي هيسيبنا نمشي كده وهو محروق؟”.
وفي وقت سابق، نشر إسلام عز العرب فيديو على حسابه الشخصي بـ”فيس بوك”، التقطه لمطرب المهرجانات حسن شاكوش وهو في البحر، وعلق عليه قائلًا: “الفيديو ده بيوضح أن الشهرة والنجومية لمطربين المهرجانات الاستهتار بحياة الناس وأرواح الاطفال وممتالكاتهم.. أولا الفنان حسن شاكوش.. طلب انه يتصور فيديو بل جيت سكي الشخصي بتاعي وينزله على صفحته وانا وافقت بدون مقابل أو فلوس”.
وتابع: “التعليمات والسؤال الطبيعي للفنان أو أي شخص عادي قبل مايركب الجيت حضرتك ركبت جيت قبل كده أو تعرف تعوم قال طبعا يعني مش محتاج Life jacket قال أنا مش محتاجه إحنا أبطال في السباحة”.
وسط زحام شديد.. الجمهور يلتف حول حسن شاكوش في الساحل الشمالي (فيديو)
واستكمل: “ثالثا الفنان حسن شاكوش.. شاف الجمهور بيصور على الشاطيء.. وبدأ يستعرض مهاراته الغلط الغير مسموح بيها علي الإطلاق ونسي انه راكب جيت سكي وكمان في بحر مفتوح وفي أمواج وكمان أرواح بنادمين وأطفال وبدأ يقف علي الجيت هو ومدير أعماله وفك المفتاح من إيده ودي كارثة عشان يشاور للجمهور لغاية ما اتقلب هو واللي معاه واكتشفنا أنه مش بيعرف يعوم أصلا وكان بيغرق”
وأضاف: “كانت كارثة المهم اللي حصل أنه عشان أول مرة في حياته يركب جيت و في الحالة دي هو كذب عليا و عرض حياته للخطر عشان التريند والهشتاج مفروض أنه كان يعدل الجيت بسهولة جدًا ويركبه تاني وده طبيعي لكن المفتاح ضاع منهم وفضل مسيطر عليه النجومية وفضل فوق الجيت وهو مقلوب لغاية ما تلف الموتور والجيت.. وطلع بالسلامة الحمدلله بمساعدة الناس”.
واختتم: “طالبته أنه يتعامل مع الموقف اللي حصل بشكل احترافي وعملي و يشوف الأضرار و التلفيات اللي حصلت في الجيت اللي أنقذ حياته قال مليش دعوة ومتعرفش تعمل حاجة معايا عشان هو مغني مهرجانات مشهور وأنا مش مندهش عشان دي تربية بغض النظر عن الشهرة والحمدلله إحنا مش في غابة إحنا في دولة فيها قانون”.
