“القاهرة 24” يحاور رئيس قطار المنصورة: “بعتذر للمجند لأني غلطت.. وأنا في عرض كل مليم وعندي أمراض مزمنة”
قال عادل فاروق عبد الهادي، رئيس قطار المنصورة، والذي أصبح حديث الساعة طيلة الساعات الماضية، بعد التهكم على مجند بالقوات المسلحة، إنه يعتذر عما بدر منه، معترفًا أنه أخطأ.
وتابع في تصريحات خاصة لـ”القاهرة 24″: “”بعترف إني أخطأت وببحث عن المجند لأقدم له اعتذارًا والسيدة التي دفعت الأجرة والدتنا.. أقدم اعتذارًا للقوات المسلحة وقيادات الجيش والسيد رئيس الجمهورية وأنا كلي خطأ”.
وأضاف: “الجزاء اللي وقع عليَّ قسم وسطي.. أنا بدفع ألف جنيه إيجار وببعت لأولادي 1200 جنيه، فالوضع مش مستحمل إنه يتخصم مني مليم أحمر”.
وكشف عبد الهادي كواليس ما دار في القطار قائلًا: “أولا الفيديو مستقطع منه، في الحقيقة أنا جالي راجل في أول عربية وقالي زميلك عامل مشكلة في آخر عربية، فرحت له لاقيته بيشد مع المجند، فسألت المجند على الاستمارة قالي مش موجودة معايا، وطلبت منه ينزل الكمامة عشان مش سامع صوته خالص، والمشكلة أن الكمامة بتاعتي كانت في جيبي، وأنا بعترف أن ده غلط”.
أول تعليق من سيدة قطار المنصورة على تدخلها لدفع تذكرة الركوب: “تخيلت المجند ابني”
وتابع: “العسكري قالي احنا مش بندفع فلوس في القطارات، فقلتله أنت تدفع فلوس فين قاللي في المعسكر، فبدأت المشكلة، وأنا غلطت ورديت عليه قلتله هما في المعسكر بيضحكوا عليك ولا أنت دماغك فيها حاجة، وطبعًا دي ذلة لسان مني، طلبت منه أنه يقعد مكانه لما قام وقف لأني حسيت أنه رافع مناخيره لفوق”.
وأردف في حديثة: “أنا قضيت جيش قبل منه من 30 سنة، وده إللي كنت عاوز أقولهوله لما قام وقف، لكني أخطأت تاني لما قلتله اقعد مكانك وبراحة على النجوم اللي على كتفك عشان متقعش، وبعدت بعيد عنه تمامًا”.
وكشف عبدالهادي لحظة مشاركة السيدة لهم في الحديث، قائلًا: “أنا كنت ماشي وهسيبوا والموضوع ينتهي على كده، لكن لقيت الست قامت وطلعت الفلوس عشان تدفعها للمجند، وأنا لما أشوف الست دي هحطها فوق دماغي، وياريتني كنت مشيت بسرعة وعافيت عنه وخلاص”
وواصل حديثة: “جيت عند الباب وطلعت التذكرة بتاعة المجند، فلقيتوا بيشد الفلوس من إيدي وقطع خمسة جنيه، فبقول للست شفتي أهو قطع الفلوس كمان أهو، فتطوعت الست من تاني وطلعت فلوس ودفعت ثمن التذكرة تاني، فلقيته بيتلفظ بألفاظ خارجة فطلبت منه الهدوء عشان نلم الموضوع، بعد كده رحت أشوف شغلي ومعرفش الشخص اللي صور الواقعة ده يبقي مين وأنا مشفتهوش وهو بيصور”.
وعن علمه بالواقعة قال: “اتصل بيَّا رئيس مباحث محطة طنطا، الساعة واحدة بالليل، وطلب مني سرد الواقعة ونمت على كده، لحد ما اتصل بيَّا مسئول وطلب التحقيق معايا، وبالفعل اتحقق معايا وعملت تحليل مخدرات وبكرة هحلل نفسي في مستشفى القوات المسلحة بسرايا القبة”.
كامل الوزير لـ”القاهرة 24″: تعامل كمسري قطار المنصورة مع المجند غير مهذب.. وأعتذر عن ما حدث
وأشار رئيس قطار المنصورة، إلى أنه تعرض لانتقادات شديدة من أهالي أصحابه وجيرانه وأهل منطقته، عما صدر منه تجاه الجندي داخل عربية السكة الحديد، قائلا: “الناس هنا مش مصدقين إني يصدر مني هذا التصرف، والكل مش مصدق إني عملت كده”.
ووجه رئيس قطار المنصورة، رسالة إلى كامل الوزير، وزير النقل، قال فيها: “أنا بعتذر له وأقول له دايما الوالد بيعفي عن أولاده، ورجاء لأني في عرض كل مليم أحمر، وعمري ما فكرت أحطه في موقف محرج، ودي غلطة مش هتتكرر، وبعتذر للمجند، والست اللي عملت كده نشيلها على دماغنا”.
وأوضح رئيس قطار المنصورة، أن قرار نقله للعمل في قطار البضائع صعب للغاية، لأنه يعاني من مشاكل صحية مزمنة، يتناول على إثرها العديد من الأدوية، مشيرًا إلى أنه يبلغ من العمر 51 عامًا، ويعمل في الهيئة العامة للسكك الحديدة منذ 28 عامًا.
وأفاد رئيس قطار المنصورة، أنه سوف يكتب اعتذارًا رسميًا، لوزير النقل، والمجند، وسيدة القطار، على ما بدر منه من تصرف غير لائق، وسوف يقوم بنشره على موقع التواصل الاجتماعي “فيس بوك”.
رئيس قطار المنصورة لـ”القاهرة 24″: بعتذر للمجند والقوات المسلحة وأنا أخطأت
