الخميس 28 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

تامر حسني يرد على أحمد السقا: “كنت أتمنى الكلام يبقى بيني وبينك.. بس الجمهور حقه يعرف الصح”

القاهرة 24
فن
السبت 10/أكتوبر/2020 - 09:12 م

رد الفنان تامر حسني على خلافه مع الفنان أحمد السقا، بسبب ظهور الأخير في فيلم “الفلوس” كضيف شرف، وأعرب عن استيائه من ظهوره في الأفيش وكتابة أنه بطولة مشتركة معه، وأن ذلك ضره نفسيًا وفي العمل، حسبما صرح مع المذيعة وفاء الكيلاني أمس عبر برنامج “السيرة”.

وكتب تامر حسني خلال خاصية “ستوري” لحسابه الشخصي على موقع تبادل الصور والفيديوهات القصيرة “انستجرام”: “حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك لو كنت زعلان من أي حاجة أو فاهم أي حاجة غلط، لإن الحاجات دي لا يمكن تفوتك وأنا كنت أتمنى مكتبش الكلام دا هنا بس عشان بعد كلامك في التلفزيون الجمهور الكريم بقى ليه حق إنه يفهم الصح، عشان أفكرك بس، أنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم”.

وأردف” “وأنا رديت عليك إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كدا لأن الفيلم متباع للخارج والداخل باسم أخوك تامر حسني وأصلًا أفيش الفيلم الرسمي نزل والناس كلها شافته وأنت مش فيه ولا فيه اسمك وكل الأبطال طالعين مرسومين معرفش وعلم من إيه الحقيقة كان ممكن تزعل لو الكلام دا نزل على صفحتي أو صفحة الشركة المنتجة”.

رد تامر حسني على أحمد السقا
رد تامر حسني على أحمد السقا

واسترسل حديثه قائلًا: “وأنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنه يا أحمد، أخيرًا بقى مستحيل الشركة تروج أو أنا أفوت أو اسمح باستخدام اسمك كبطل للفيلم وأنت مش فيه، لإن دا هيعود علينا كلنا بالضرر لإن الناس هتدخل الفيلم مش هيلاقوا الكلام دا فيبقى احنا كدا بنضحك على الناسوضرينا الفيلم ولأن أكيد يشرفني إن احنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلًا”.

واختتم حديثه عن مشاركته بمسلسل “ولد الغلابة”: “وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا دا ضيف شرف بس وأنت عارف إن عمري ما عملتها وطلعت ضيف شرف غير ليك، دا أنت طبلتي أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت لإنك غالي عندي أوي أوي فوق ما تتصور، وكنت بفرح باحتهادات محبينك ومحبيني حتى لو صورتي صغيرة أو كاتبين بطولة أو ضيف شرف كل دا مش فارق لإني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا، أنت حبيبي يا أحمد وصديق عمر عشان كدا أنا مش هزعل منك معلش طولت في الكلام لإن برضو زعلك يعز عليا”.

رد تامر حسني على أحمد السقا
رد تامر حسني على أحمد السقا

فيلم “الفلوس” ضم العديد من الفنانين منهم تامر حسني، خالد الصاوي، زينة، عائة بن أحمد، محمد سلام، وظهر خلال أحداث الفيلم العديد من ضيوف الشرف منهم أحمد السقا، مي عز الدين، الراقصة جوهرة، والفيلم قصة تامر حسني، وتأليف محمد عبد المعطي، وإخراج سعيد الماروق.

المجاملات تتسبب في خلافات بين السقا وتامر حسني وتنتهي بـ”الفلوس”

أحمد السقا: “تامر حسني عمل معايا موقف أثر عليا نفسيًا.. بس أنا مسامحه” (فيديو)

تابع مواقعنا