صدور ديواني عايشها بالفطرة والرسم بالكلمات لمحمد ناجي الإبطاوي
صدر حديثا ديوانا للشاعر محمد ناجي الإبطاوي وهما ديوان الرسم بالكلمات وديوان عياشها بالفطرة.
من أجواء ديوان عايشها بالفطرة
وكأنى كنت ضرير ودى أول مره بشوف
مش فاكر آخر مره شفتك فين
يمكن مره زمان كنت قابلتك وسألتك
هوه الشارع دا اللي اسمه عماد الدين
يروحوله منين
مش فاكر شفتك فين
يمكن مره قعدنا على القهوة زمان
ولا عزمت عليا بسجارة دخان
يوووووه
استنا
انا ما بدخنش
من وأنا ف الإعدادي
لما أمي شمت ريحة بقي وقالتلى حرام
بطلت التدخين
وعندى يقين انه حرام
مع إن ساعات باخد كاس وسكى
وقزازة بيره
لما اكون زعلان
يمكن لو أمى كات عايشه
كات خصمتنى ليوم الدين
بس أنا شوفتك فين
فكرنى ورد
انا شوفتك فين
نفسى ارتاح
تصدقنى لو اقولك جوايا براح
وسكون مش مسكون
والرضا بالمكتوب
زى ايمانى بالله
وان اللى ي عوزه المولى ب يكون
وانى ف الدنيا يدوب عابر
ولما اموت
عندى يقين
انى كنت سبيل
للناس الجايبن من بعدى
وان مكانى
غيرى هيقعد فيه
وسريرى
غيرى ح يتمدد فيه
وسيرتى
هتفضل موجوده من بعدى سنين
وسنين وسنين
بس انا شوفتك فين
فين
فين
شكلك مأوف
وكأنى كنت ضرير
ودى اول مره ب اشوف
واتارينى ف اوضتى
وشايف نفسى ف مريتى
اللى بقالى سنين موقفتش قدمها
ب اسأل نفسى
شوفتك فين.
أنا شفتك فين
