اتنصب علينا واتعرضنا للبلطجة.. شاب يحذر من شركة تنظيم بازار ملابس بسبب سوء معاملتها
حذّر شاب يُدعى أحمد عاشور من شركة شهيرة لـ تنظيم بازرات الملابس، بسبب سوء تعامل المنظمين خلال معرض ملابس بـ التجمع الخامس، حيث ترك المسؤولون عن التنظيم أماكنهم أثناء فعاليات المعرض، ورفضوا إعطاء العملاء أموالهم، بالإضافة إلى المشاجرة معهم والاعتداء عليهم بالضرب.
وشارك أحمد عاشور فيديو عبر حسابه بمنصة تيك توك، حذر فيه من التعامل مع شركة تنظيم شهيرة لـ معارض الملابس، بسبب سوء خدماتها وسلبيتها في تنظيم المعرض، بالإضافة لعدم تعاملها مع مشكلات العملاء خلال المعرض ورفض الشركة إعطائهم أموالهم.
شاب يحذر من شركة تنظيم معرض ملابس بسبب سوء معاملتهم
وقال أحمد في الفيديو: كله ينزل حالًا، شوفوا يا جماعة اللي إحنا فيه بنتعرض للبلطجة ومفيش حد من المنظمين، إحنا اتنصب علينا من شركة كانت بتنظم معرض للملابس في التجمع الخامس وكل أصحاب الأنشطة التجارية اللي هما إحنا نزلنا للمعرض عشان ده أكل عيشنا وشوفنا إعلان للشركة دي على الفيسبوك وفيه كذا بلوجر اتكلموا عنهم كويس.
وأردف: لكن اتفاجئنا وإحنا في البزار إن المنظمين سابونا ومشيوا منعرفش راحوا فين، وحصلت خناقات وبهدلة والدنيا هنا في المعرض، خربت على الآخر، وطبعا فيه ناس مننا اتعورت وراحوا القسم ودلوقتي الدنيا والحاجة اللي معانا اتبهدلت ووقعت على الأرض والناس كلها بتلم حاجتها والمنظمين مش راضيين يدونا فلوسنا بعد كل ده طب نعمل ايه وقافلين تليفوناتهم، ومش راضيين يوجهونا بعد اللي حصل فينا.
واختتم: إحنا مش هنسكت على اللي حصل وهنجيب حقنا، عشان اللي حصل فينا ميرضيش ربنا ابدًا وحسبي الله ونعم الوكيل فيهم، وإن شاء الله ربنا يرجعلنا حق البهدلة والتعب اللي شوفناه في حياتهم.
