مش أمان.. فتاة تشكو من إندرايف بسبب دهس السائق لكلب في الشارع
نشرت فتاة تدعى خديجة مصطفى، منشورًا لها عبر حسابها بمواقع التواصل الاجتماعي، فيسبوك، تشتكي فيه من شركة التوصيل الشهيرة إندرايف، بسبب دهس السائق لـ كلب في الشارع أثناء رحلتها، ودعت المتابعين بمقاطعة شركة التوصيل بسبب فعل السائق.
وقالت خديجة مصطفى، في منشور لها عبر حسابها بموقع فيسبوك: محدش يركب إن درايف تاني يا جماعة، مش أمان وبيوظف سواقين مختلين عادي ولما اشتكيت محصلش أي حاجة خالص، يوم الثلاثاء اللي فات خدت إندرايف والسواق ماشي خبط كلب بالقصد، يعني كسر ناحيته وخبطه، قولت له ليه عملت كدة، قاللي أنا بفوقه بس، قولت له تحب حد يعمل فيك كدة؟.. قاللي أه عادي أنا أحب لو نايم حد يفوقني عادي، وبعدين الكلب ده نجس أصلا، أنا مبحبش الكلاب.
وتابعت: قولتله مبتحبهومش أنت حر بس متأذيهمش، قاللي لأ عادي، أنا أصلا دهست كلب قبل كدة ساويته بالأسفلت، والله العظيم قالي كده، بدأت أترعش من كتر بشاعة اللي هو بيقوله وقولت له اركن علي جنب فورًا وبعد شد، ركن علي جنب ونزلت.
وأوضحت الفتاة: الشخص المريض السادي ده بيموت كلاب لمجرد أن مبيحبهمش وإنه شايف إنه نجس، ولو أنتم مش مهتمين بروح حيوان فأحب أقولكم اللي يقتل حيوان انهاردة عشان مبيحبهمش ونجس من وجهة نظره، يقتل بني آدم عادي جدًا لمجرد أنه مش عاجبه.
وأضافت خديجة مصطفى: اشتكيت في الأبليكيشن ومعملوش أي حاجة، وأنا من ساعتها وأنا هتجنن، لا عرفت آخد حقي ولا حق الحيوانات المسكينة اللي بيأذيهم المريض ده، ده رقم العربية كنت واخداها سكرين شوت من الأبليكيشن، قولولي نقدر نعمل إيه عشان اللي زي ده يتحاسبوا وعشان دة ميتكررش تاني؟!.. وإندرايڤ لازم تتحاسب على الناس المريضة اللي بتوظفها وكمان مبتحاسبش حد، قاطعوا إندرايف يا جماعة، بجد مش أمان وسمعت بلاوي كتير على سواقينهم وإن مش بيعملولهم فيش وتشبيه وحقيقي مش أمان خالص.
