المتهم بصفع زميلته داخل مطعم بمدينة نصر: أنا غلطان ومستعد للتصالح بس هي حابة الشو
أقدم شاب يعمل شيف في أحد المطاعم بمدينة نصر على صفع زميلته على وجهها مما تسبب في فقدان اتزانها لتسقط على الأرض وحاول أحد العاملين بالمكان إفاقتها.
المتهم بصفع زميلته داخل مطعم بمدينة نصر
وقال المتهم بصفع زميلته: اللي حصل إني شغال شيف في مطعم شاورما مع مروة وأنا بقالي 4 شهور شغال في المطعم وأنا ومروة كان بينا هزار وضحك وكنا بنصور تيك توك مع بعض ومفيش بينا أي حاجة وهي زي أختي، لحد من فترة قريبة بدأت تعمل معايا مشاكل في الشغل وأنا بدأت أبعد عنها وبقينا نقف لبعض على الواحدة.
وأضاف المتهم: وفي يوم من الأيام عاملة نظافة شغالة في المطعم جات قالتلي إن في واحدة قريبتها عروسة وهي جبتهالي وأنا قولت اتوكل على الله وروحنا بعدها بيومين للعروسة أنا وأهلي قعدنا قعدة تعارف وأنا كنت طاير من الفرحة.
وأكمل المتهم بصفع زميلته داخل مطعم بمدينة نصر: وبعد يومين لقيت أمي بتقولي كل شيء قسمة ونصيب فسألتها ليه قالتلي بسبب مروة اللي شغالة معاك عشان راحت قالت عليك كلام وحش وغلطت فيك وفي حقك.
وواصل المتهم بصفع زميلته داخل مطعم بمدينة نصر: اليوم ده أنا كنت إجازة من تسرعي وغضبي روحت قولتلها ليه أنتي بتتكلمي في حياتي وضربتها قلم واحد وأنا عارف إن ده غلط وأنا غلطان وحاولت بعد كده أراضيها ولقيتها مش عايزة تتراضى وهي حابة الشو، وأنا عارف إن كل اللي عملتوا غلط والموضوع غصب عني وخارج عن إرادتي وعمري في حياتي ما غلطت في واحدة ولا مديت أيدي على واحدة.
