البصمة بترانيم على الجيتار.. اتهامات لمتجر ألعاب شهير في مصر بالتمييز الطائفي واستغلال عماله
شارك أحد مستخدمي السوشيال ميديا منشورًا زعم فيه وجود تعليمات طائفية ودينية داخل متجر شهير للألعاب في مصر، واتهامات حول وجود نشاط تجاري غير معلن، يتم إدارته بإجبار الموظفين على ترديد ترانيم وآيات من الإنجيل وتصويرهم بشكل سري.
اتهامات لمتجر ألعاب شهير في مصر بالتمييز الطائفي واستغلال عماله
وزعم أحد مستخدمي السوشيال ميديا وجود تعليمات طائفية ودينية تتم في متجر ألعاب شهير له عدد كبير من الفروع في مصر، وقال في منشور: فيه كيان مزروع في مصر وماحدش فاهم هدفهم إيه.. مجموعة من الموظفين اتواصلوا معايا يكلموني عن مكان بيبيع ألعاب اسمه Open The Door، كانوا شغالين فيه ولكنهم مقدروش يكملوا والموضوع مريب وغريب جدًا.. المكان موجود في كل مولات مصر تقريبًا، سيتي سنتر ألماظة، كايرو فيستيفال، مول العرب، آربيلا بلازا.
وأضاف: المدير العام بتاع المكان دا هو راجل صيني اسمه (جو)، لما بيوظفوا الموظف بيدخل جروب الشركة على تيليجرام، وبيتطلب منه حاجات معينة يعملها يوميًا، مع البيع وغيره، الموظفين بيقولوا إن المكان أول ما فتح مكنش فيه بصمة، لكن بيتطلب منك حاجة تعملها إثبات حضور، إنك لازم تمسك لعبة، حاجة زي الجيتار كدا، اسمها اليوكوليلي، اللي بالمناسبة الجيتار دا بيتباع من ضمن الألعاب وهو أهم لعبة عندهم لدرجة إنها مقدسة.
وتابع: البصمة بتاعتك إنك تقعد وتعزف على اليوكوليلي دا، وتغني أغاني باللغة الأجنبية، الأغاني دي الموظفين مكنوش فاهمينها ولا فاهمين معناها.
وأردف: كان المدير بيلم الموظفين كلهم ويفضلوا يغنوا الأغاني دي، ويصورهم، لحد ما اتصدموا وعرفوا إنه كان بيخليهم يقرأوا حاجات من الإنجيل وهما ميعرفوش، والفيديوهات اللي صورهالهم ميعرفوش كانت بتروح فين.
وأكمل: علشان تشتغل في المكان لازم تنفذ تعليماتهم اللي كانوا بيقولوها للموظفين بعد ما يختاروهم، إنهم يحبوا المسيح، يصلوا علشانه، يحبوه بقلبهم، وأي مكان كانوا بيروحوه لازم يكون معاهم الجيتار دا اللي اسمه اليوكوليلي، ولازم يغنوا في الكافيهات والأماكن اللي مدير الفرع بيعزمهم فيها، يقولوا الكلمات اللي بيحفظهالهم وفي النهاية طلعت عبارة عن كلمات في الإنجيل.
واختتم: بيصورهم والفيديوهات دي ماحدش عارف بتروح فين، الغريب بقى والمريب إن فيه تعليمات مشددة جدًا منهم إن أي حاجة بتدور بينهم في المكان تكون سر، أي كلام بيقوله مدير الفرع الصيني لازم يكون سر، وإنهم يحفظوا سر اتجاهاته وميوله ومتطلعش لحد نهائي، وبيشدد على دا كتير في رسايل بيبعتها في الجروب كل فترة، ولو حد من الموظفين قال لحد أي حاجة بتدور في المكان بيترفد.
