حروق بالوجه.. أول تعليق من أسرة سما ضحية انفجار الغاز بأكتوبر: كانت بتجري في الشارع وهي محروقة

ناشدت أسرة سما، طالبة طب أسنان جامعة القاهرة، المصابة في حادث انفجار خط غاز بمدينة أكتوبر بمحاسبة المسئولين عن الحادث، لإرجاع حقها بعد تعرضها للإهمال.

أول تعليق من أسرة  الطالبة سما ضحية انفجار الغاز بأكتوبر

من جانبه، قال أحمد سينجر، عم الطالبة سما لـ القاهرة 24:  سما طالبة في أخر عام في طب أسنان القاهرة، كانت راجعة من استعدادات مشروع التخرج وامتحانات كمان كام شهر، هي متفوقة جدا في دراستها.

وأضاف: يوم الحادث سما كانت راكبة مواصلات، وفجأة حصل الانفجار.. نزلت تجري في الشارع وهي محروقة، لحد لما وصلنا لها ونقلناها للمستشفى، حالتها كانت منهارة، والحروق شديدة في وشها ورقبتها وجسمها، وكان لازم تدخل العمليات علشان الحريق أثر على الأعصاب.

وأوضح  أن الصدمة النفسية التي مرت بها سما كانت قاسية، قائلا: بنت صغيرة في بداية حياتها اتشوهت، ومش مستوعبة اللي حصل، حالتها النفسية سيئة جدًا وهي دلوقتي في العناية المركزة، البنت كانت في حالة انهيار مش مستوعبة اللي حصل، هي في العناية المركزة دلوقتي وحالتها النفسية سيئة جدا.

وأشار إلى أن الحادث لم يكن الأول في حياتها، قائلًا: من سنة، شاب طايش خبطها بعربيته، ودخلتنا في دوامة وجاتلها حالة اكتئاب، ومن ساعتها رفضت تسوق عربيتها، علشان كده كانت راكبة مواصلات يوم الانفجار.

واختتم رسالته قائلًا: إحنا مش طالبين غير حقها.. هي كانت على وشك التخرج، ومعرفش هتلحق امتحاناتها ولا لأ. لازم المسؤول عن الإهمال يتحاسب.