مروة عبد المنعم: بكلم ربنا وبقوله نفسي أشتغل.. وعشت في بيت من غير سقف ولا باب
أعربت الفنانة مروة عبد المنعم، عن استيائها الشديد بسبب عدم حصولها على أدوار بالأعمال الفنية، موضحة أنها تدعو الله للحصول على فرصة عمل بالفن خلال الفترة المقبلة.
وقالت مروة عبد المنعم، في تصريحات تليفزيونية: أنا بتكلم مع ربنا وبقوله يا رب يعني أنا نفسي أشتغل طيب أنت ليه حببتني في الفن ما أنت اللي اديتني الموهبة دي، طيب إنت مش عايزني أشتغل؟، أنا مش معترضة على حكمك، أنا بجتهد أبقى راضية بس أنت ساعدني لأني غصب عني نفسي أمثل.
مروة عبد المنعم تكشف تفاصيل تعرضها للنصب
كما كشفت مروة عبد المنعم، تفاصيل تعرضها للنصب من مهندس ديكور قائلة: كنت عايشة في شقة إيجار وكان لازم أمشي خلال شهرين علشان رفعوا الإيجار أوي، وكان عندي شقة على المحارة ومكنش معايا فلوس أخلصها، وكان في مهندس ديكور عاملي حاجات غلط جبت مهندس غيره وقولته الغلط ده نشيله ونبدأ من جديد ومكنش معايا غير مبلغ صغير وقولتله كل ما تشتغل هديلك فلوس، هو اشتغل على الغلط والفلوس اللي خدها محاسبش الصنايعية ومعمليش حتى الأبواب، وقعدت في شقة من غير سقف ولا باب، وكنت بقولهم أنا عايزة أعيش، ولقيت في مبلغ كبير أوي عليا واضطريت آخد قرض علشان أسدد.
واستكملت مروة عبد المنعم: أنا معنديش راجل اتسند عليه، واللي عندي هيخاف أقوله أنا عايزة فلوس، والناس خبطت عليا قالولي الحمام بينقط قولتلهم قسما بالله ما هعمل حاجة، حسبي الله ونعم الوكيل، عشان شايفين أني لوحدي مفيش حد هيقدر عليهم.
