مروة عبد المنعم عن دخولها التيك توك: وشي بيجبلي فلوس.. واللي متضايق يشغلني
علقت الفنانة مروة عبد المنعم، على انتقادات دخول الفنانين والمشاهير عالم التيك توك والبث المباشر والجولات، موضحة أنها لم تدخل بسبب العائد المادي.
وقالت مروة عبد المنعم، لـ القاهرة 24: أنا واحدة دخلت التيك توك وبدأت افتح لايفات، وأنا عملت ده لأن ليا برنامج رمضاني مع مشاهير التيك توك، فكان لازم أدخل العالم بتاعهم، وعندي ثقافة ممكن تكون بعيد شوية ولكن ممكن بعد كام سنة تتفهم إننا نستخدم مواقع التواصل الاجتماعي بطريقة مفيدة.
وأضافت: أنا مش ضد اللايفات والتواجد لكن ضد إني استخدمها بطريقة سخيفة أو أني أهين نفسي، ولكن دي طريقة حلوة أني أوصل رسالة وأعمل محتوى.
مروة عبد المنعم: مش عيب أن الناس تدخل التيك توم علشان الفلوس
وأكدت أنه لا يوجد لها عائد مادي من التيك توك، قائلة: مش عيب أن الناس تدخل التيك توك وتفتح لايفات علشان الفلوس، هو أنا بشتغل عشان إيه؟ ولكن أنا مبفتحش لايفات علشان الفلوس ولكن علشان التواجد، وفي نفس الوقت لازم كل فترة أعمل جولة.
وأضافت: أنا مبكسبش من التيك توك، بيطلعلي 100 ولا 200 جنيه آخر الشهر يبقى أنا داخلة علشان الفلوس؟، لما يجي حد مبيشغلنيش خالص يتكلم طيب أكسب منين، وشي بيجبلي فلوس، والله متضايق شغلني متتكلمش عليا دي وجهة نظري.
