إديت الفلوس لأبويا وأمي.. أول تعليق من صاحب تريند الدليفري سيرًا على الأقدام | خاص
تصدر مقطع فيديو لـ شاب يعمل مندوب شحن، تريند منصات التواصل الاجتماعي، خلال الساعات القليلة الماضية، إذ ظهر الشاب خلال تأدية مهام عمله في شحن الطلبات، بأحد شوارع مدينة نصر، ليوقفه أيمن مصطفى مذيع برنامج حياة كريمة، ويعرض عليه مبلغا من المال، خصوصا أن الشاب يعمل في توزيع الطلبات سيرًا على الأقدام دون استخدام دراجة، وحينها ظهر الشاب في حالة من الرضا والقناعة.
أول تعليق من صاحب ترند الدليفري سيرًا على الأقدام
وقال الشاب هاني خالد داوود، صاحب الـ 25 عامًا، ابن مركز البدرشين بمحافظة الجيزة، الذي تصدر التريند خلال الساعات القليلة الماضية، بسبب ظهوره في فيديو خلال مهام عمله الشاقة وهو في حالة من الرضا، في تصريحات خاصة لـ القاهرة 24: مكنتش متوقع التريند ولا حتى انتشار الفيديو بكل هذا القدر على منصات التواصل الاجتماعي، ويوم ما قابلني الأستاذ أيمن كنت في الشغل عادي بسلم أوردرات شحن، وقابلني صدفة في يوم شغل عادي.
وأضاف الشاب هاني خالد، عامل الدليفري صاحب تريند الدليفيري سيرًا على الأقدام: أنا مبسوط وراضي عن عملي حتى لو بتعب فيه، وأهم حاجة عندي رضا والدي ووالدتي عليا، إحنا 5 إخوات، وأهلي أغلى حاجة في حياتي، لإن إحنا اتربينا على الترابط الأسري، وأهلي تعبوا لحد ما كبروني كتر خيرهم وطلعوني راجل.
وأردف الشاب هاني خالد داوود، عامل الدليفري: بشكر كل الناس اللي قالت كلمة حلوة في حقي على السوشيال ميديا بعد تداول الفيديو، وكلامهم عني بالدنيا كلها، وبقول لأي حد مبيشتغلش وقاعد مستسلم لظروف الحياة، اجتهدوا وسيبوا الباقي على ربنا، وربنا بيجازي وبيكرم اللي بيتعب ويشقى.
واستكمل عامل الدليفري: أنا كنت رافض آخد الفلوس لإن فيه ناس تانية تستحقها أكتر مني، زي المرضى اللي محتاجين العلاج، لكن أنا ربنا مديني أقدر أشتغل، وهشتري العجلة الأسبوع الجاي وباقي الفلوس إدتها لوالدي ووالدتي، وأتمنى الخطوة الجاية أفتح مكتب شحن، وأنا بنزل من البيت الساعة 10 وبطلع من البدرشين على مدينة نصر كل يوم، المشوار بعيد والمواصلات صعبة، بس الشغل حلو وبقدر أسلم الشغل في المنطقة دي، وربنا بيرزق في الآخر.
