ملك أحمد زاهر: بابا مشبعنا من الحنية ومش هدور على راجل بره.. هستنى اللي يستاهلني
أكدت الفنانة ملك أحمد زاهر، أن والدها الفنان أحمد زاهر غمرها هي وشقيقاتها بالحب والحنان والاحتواء، ما جعلها لا تشعر بالحاجة للبحث عن رجل يمنحها تلك المشاعر خارج إطار العائلة.
وقالت ملك أحمد زاهر في تصريحات تليفزيونية: بابا مشبعنا أنا وأخواتي البنات من فكرة وجود الراجل والحنية والاحتواء والأمان.. فمش همشي أدور على ده بره.. لكن هقعد وأحط رجل على رجل لحد ما يجيلي اللي يستاهلني.
ملك عن زفاف شقيقتها ليلى: اتخضيت في الأول.. بس فرحانة لها من قلبي
وفي سياق آخر، تحدثت ملك زاهر عن مشاعرها تجاه زواج شقيقتها ليلى زاهر من المنتج الشاب هشام جمال، مؤكدة أن علاقتهما القوية جعلت فكرة استقلال كل واحدة بحياتها تجربة مؤثرة بالنسبة لها.
وأضافت في تصريحاتها لـ القاهرة 24: أنا وليلى متربطين ببعض جدا، وإحساس إن كل واحدة ليها حياتها خضني في الأول، لكن بدأت أتأقلم لأني مبسوطة لها أوي. بحسها بنتي رغم إن الفرق بينا سنة بس.. عملت اللي بتحبه واتجوزت اللي بتحبه، ويا رب تعيش في سعادة وهناء.
وفي وقت سابق، نشرت ملك رسالة مؤثرة على حسابها بمواقع التواصل الاجتماعي تعبيرا عن حبها العميق لشقيقتها، وقالت: من أول ضحكة وإحنا أطفال لحد لحظة كتب كتابك.. كل لحظة في الفيديو ده هو عمر كامل بينا، هو حب وأمان وضحك ومشاركة.. علاقتي أنا وإنتي مش شبه أي حد.. مش مصدقة إن الوقت جري كده.. كنا لسه صغيرين وبنتخانق على اللبس، وفجأة لقيتك لابسة فستانك الأبيض.. أحلى عروسة شافتها عيني.
