أبرز تصريحات حنان مطاوع: بكتب وصيتي عشان أفكر نفسي بالموت.. ولحظة وفاة والدي اتلغبطت في الدعاء
حلت الفنانة حنان مطاوع، ضيفة على أحد البرامج التلفزيونية، وتحدثت خلال اللقاء عن تفاصيل وفاة والدها الفنان كرم مطاوع، موضحة أنها مرت بمشاعر متخبطة عقب تلقيها صدمة وفاته، بجانب حديثها عن سبب كتابتها لوصيتها.
وقالت حنان مطاوع، عن لحظة وفاة والدها في تصريحات تليفزيونية: ابن عمي اتصل وكان عمره ما اتصل على البيت، وهو كان صغير وقتها وعنده 12 سنة، وأنا رايحة برد عليه وشايفة سيناريوهات أصل هيكلمني ليه؟، قالي عمو كرم عايز يشوفك، قولتله عايز يشوفني ولا في حاجة حصلت وعايزني أجي؟، قالي تعالي بس، هو أول ما قالي تعالي بس دي أنا رجليا مكنتش قادرة تشيلني وفي سيناريوهات في دماغي يمكن تعبان أوي يمكن هلحق أقوله أو يقولي أي حاجة أو أقوله أني بحبه، مليون فيلم في دماغي، ورحت المستشفى وهي من تحت شكلها مقلوب وفي صحفيين كتير وناس بتصور.
وأردفت حنان مطاوع: لغاية ما طلعت وشفته مكنتش مستوعبة أي حاجة، ومكنتش مستوعبة أنه من كام ساعة كان واهم ولكنه كان بيتكلم، فكنت واقفة متلغبطة في كل حاجة حتى في الفاتحة وكل القرآن اللي أنا حفظاه ومش عارفة أدعي، كنت بدعي ربنا يشفيه وهو متوفي قدامي، كل حاجة كانت متلغبطة وموقف صعب أوي على بنت عندها 17 سنة.
حنان مطاوع تكشف سبب كتابتها لوصيتها
أما عن سبب كتابتها لوصيتها، فعلقت حنان مطاوع: شغلتنا بتضخم جدا الإحساس بالذات، فـ طول الوقت بذكر نفسي وبخطط للآخرة لأنها رحلة جميلة في معية الله.. أكيد مش بخطط للآخرة بنفس المقدار، وحب الدنيا وصراعتها وخدانا أكتر، بس بفكر نفسي إن آخرها متر في متر.
حنان مطاوع: عندي امتنان لـ ربنا
وواصلت حنان مطاوع: عندي امتنان حقيقي من كل قلبي لـ ربنا لدعمه واختياراته وتسخيره لأقرب الناس ليا، وممتنة للناس اللي حواليا وده اختيار ربنا، أنا حد شاكر لـ ربنا والناس اللي حواليا ولنفسي أني بحاول أبقى حد أحسن.
