بعد أزمة أحمد آدم ومحمود حمدان.. ياسر عزت: فنان كبير في بدايتي قالي هي المشرحة ناقصة قُتلا؟!
كشف الفنان ياسر عزت موقفًا مر به في بداية مشواره الفني، حيث أشار إلى أن نجمًا سخر منه في بداية مشواره، خلال زيارته للوكيشن أحد الأعمال الفنية التي كان يشارك فيها صديقه الفنان محمد لطفي، وحينما رحب به لطفي في اللوكيشن، سخر منه نجم شهير.
ياسر عزت: فنان كبير في بدايتي قالي هي المشرحة ناقصة قُتلا؟!
وكتب ياسر عزت منشورا، عبر حسابه الشخصي بموقع التواصل الاجتماعي فيس بوك، جاء فيه: بمناسبة البوست بتاع الكاتب والمؤلف محمود حمدان بخصوص الفنان أحمد آدم، مرة زمان كنت بعمل مسرحية اسمها كاليجولا، وجه الفنان محمد لطفي يتفرج وعجبه العرض، وصارت صداقة على الضيق كدة، وكان الفنان محمد لطفي بيصور فيلم وقتها فيه نجوم كتير أوي وإخراج مخرج كبير، طلبت منه إني أروح أزوره في التصوير، وأهي فرصة يمكن يكون فيه نصيب لشغل يعني.
وأضاف ياسر عزت: روحت اللوكيشن واستقبلني الفنان محمد لطفي كويس جدًا مع إني مكنتش صاحبه أوي بصراحة، وصادفت إن الكاست كله كان متجمع وقاعدين مع بعض نجوم الفيلم كلهم، فخدني من إيدي ودخل قالهم ده ياسر عزت ممثل وشوفته بيعمل كاليجولا وممثل جامد جدًا، فكان موجود نجم أكبر الموجودين سنًا، رد عليه قاله يا سلام.. ممثل جامد جدا، هي المشرحة ناقصة قتُلا يعني، إيه جامد جدا دي؟!.
وواصل ياسر عزت: مفهمتش ساعاتها هو بيتكلم بجد ولا بيهزر ولا إيه بالظبط، بس خدت الكلمتين ومن اللوكيشن على بيتنا وحتى مقابلتش المخرج، النجم الكبير مش بس كبير بنجوميته لا ده كبير باحتوائه للأصغر منه في الشغلانة والدعم للصغير ده واجب على أي نجم كبير، حتى لو مشجعوش ميحبطوش لأنه بسبب كلمة أو تصرف ممكن يبطل الشغلانة أساسا، طبعا أنا مش هقول اسم النجم الكبير ده، أحسن الناس الكيوت الملايكة أم جناحات تشتمني، وأطلع قلبي أسود ومبسامحش وربنا مش هيكرمني أبدًا.
وياسر عزت ليس الفنان الأول الذي يشكو من سخرية النجوم من الشباب، في بداية مشوارهم الفني، حيث إنه في الأيام الأخيرة أثار محمود حمدان حالة كبيرة من الجدل بعد تصريحاته عن سخرية أحمد آدم منه في بداية مشواره.
