تريزيجيه: لاعبو الأهلي لازم يفهموا أنه بعد أول ماتش الحساب بيبدأ.. واللي بيخرج عن السيستم مش بيكون موجود
وجّه محمود حسن تريزيجيه بعض الرسائل لـ لاعبي النادي الأهلي قبل انطلاق مسابقة كأس العالم للأندية 2025.
تصريحات تريزيجيه
وقال تريزيجيه في تصريحات تليفزيونية: كل شخص بيلعب في الأهلي فـ هو بيمثّل النادي الأهلي والجمهور واللاعيبة والإدارة مش بس نفسه، وهناك سيستم في الأهلي اللي بيخرج عنه مش بيبقا موجود، ولو واحد مش متظبط فـ بيتظبط غصب عنه.
وأضاف: أحب التحديات في النادي الأهلي، والضغط هو متعة الكرة، والمنافسة في صالح الفريق، ولو لاعب بيلعب مكاني هكون أول واحد بيدعمه.
وأشار تريزيجيه في تصريحاته: النادي الأهلي علّمنا نحلم.. واحنا لاعيبة مستوى عالي ولاعيبة رجالة وعارفين يعني اي النادي الأهلي، ولاعبي الأهلي لازم يفهموا إن بعد أول ماتش الحساب بيبدأ، ولازم يبقوا عاملين حسابهم هما داخلين على اي!، الأهلي مش بيرضى بـ التعادل.
وأردف: الأهلي لازم يبقا قائمته بالقوة دي، وكل لاعب بيطلع أقوى نسخة منه لأنه عارف إن فيه لاعيبة قوية في مركزه.
واستمر تريزيجيه في تصريحاته: أبارك لـ زيزو على الانتقال للنادي الأهلي وسيكون إضافة قوية وكبيرة للفريق، وكان شايل الزمالك وجابلهم بطولات.
وعن مباراة إنتر ميامي، علّق قائلًا: مع صافرة الحكم الرؤوس بتتساوى، ومفيش في الكورة لاعب أكبر من لاعب، ومباراة الافتتاح 11 لاعب ضد 11 عادي، والحكم هيصفّر والرؤوس هتتساوى والملعب موجود.
وأكد: زعلت لما أبو تريكة وبركات ومتعب وغالي اعتزلوا؛ لأنهم كانوا شايلينا كتير، وحسيت ساعتها إن فيه تغيير كبير حصل.
وشدّد تريزيجيه في تصريحاته: لاعبو الجيل القديم كانوا شغل بس وحياتهم كلها كرة قدم فقط، وهذه هي حياتي، من النادي للبيت ومن البيت للنادي، وكل يوم عندي قصة وبقول هنجح فيها ازاي، وعمري ما سهرت لأني مش بستمتع بكدة، والسهر وعدم الالتزام يؤثر على اللاعبين بالسلب، وزوجتي تهيئ لي الجو المناسب لأنجح في مجالي كـ لاعب كرة قدم.
وأتم: كنت أحصل على 25 ألف جنيه في الأهلي وأنا 17 سنة.
