دعاء فاروق: نقلي لرحلة الحج لمس قلوب الناس.. ومعقول نصور نفسنا في كل مكان ومنصورش عظمة ربنا
تحدثت الإعلامية دعاء فاروق، عن رحلة الحج وأهمية تصويرها وتوثيقها، بجانب تعليقها على إشادة الجمهور ومتابعتهم لنقلها تفاصيل رحلة الحج كل عام، معربة عن امتنانها الكبير.
وقالت دعاء فاروق، في تصريح خاص لـ القاهرة 24: رحلة الحج دي أحلى رحلة في الحياة، يكفي أنك بتروحي وبترجعي عندك إخلاص النية بعد ما خلصتي المناسك وبترجعي كما ولدتك أمك خالية من الذنوب، دي رحلة تنقية للنفس والروح، المفروض أن الناس تبقى رايحة عاقدة النية لتنقية الروح ويتخلوا عن الذنوب وأي حاجة وحشة بيعملوها، ربنا يرزق الجميع على قد تعبها على قد متعتها.
دعاء فاروق: تفاجأت من رد فعل الجمهور على نقلي لرحلة الحج
وأردفت دعاء فاروق: أنا مكنتش عاملة حسابي أني أنقل رحلة الحج، واتفاجئت من رد الفعل الرهيب اللي جالي ده، ده كرم وربنا وضع قبول أنا مكنتش متخيلاه ولا مدركاه، أنا كنت بصور عادي للناس أول ما دخلنا الكعبة وعرفة، دي حاجة تستاهل التوثيق، أنا عندي صور أمي وأبويا وهما في الحج في الثمانينات، ولغاية دلوقتي بحب أشوف صورهم وممتنة أن كان معاهم كاميرا وصوروا، دي حاجة حلوة، يعني نصور نفسنا في كل مكان في الدنيا ونيجي عند الحج ومنصورش العظمة دي؟ دي عظمة ونتشرف إننا نصور رحلة الحج، وربنا وضع في تصوير القبول ولمس قلوب الناس وده مش بـ إيدي، ربنا اللي قدرلي أني أصور اللحظات الصادقة دي.
