دخل في نفق مقطوع ولما حاولت أنزل شد إيدي.. سيدة تشكو من سائق إندرايف: بلطجي ولازم يتحاسب |خاص
عبرت سيدة عن استيائها من شركة إندرايف بسبب التعامل السيئ من أحد سائقي الشركة بسبب رغبته في إلغاء الرحلة بالطريق، وتغيير مسار الرحلة ما دفع السيدة للاستغاثة.
سيدة تشكو من سائق إندرايف
وقالت هدى أشرف في تصريحات خاصة لـ القاهرة 24: طلبت إندرايف عشان كنت رايحة مشوار لما كلمته في التليفون قالي ممكن تلغي الرحلة وأنا هجيلك عشان عندي مديونية مع الشركة وعايز أسددها طبعا رفضت ولما جه واتحركنا طول الطريق عايز يلغي الرحلة وأنا طنشته.
وأوضحت: فجأة لقيته غير مسار الرحلة عن الطريق المعتاد اللي بمشي فيه ودخل من نفق مقطوع، فتحت الباب وقعدت أصرخ فراح شدني من إيدي وقالي مش هتنزلي وفضلت أصرخ تاني عشان حد يلحقني والحمدلله سائق تاكسي شافني ونزل.
وتابعت: سواق التاكسي حاول يحل الموضوع بشكل ودي معاه وبيقوله خد فلوس الرحلة بس متركبش معاك والتاني رافض بكل الطرق وزعق وعلى صوته وبيعمل حركات بلطجية وقاله مش هتركب غير معايا لحد ما اتخانق مع السواق وضربه وبهدله واتصاب، لدرجة أن هدومه اتغرقت دم.. حسبي الله ونعم الوكيل فيه.
لازم اللي زي ده يتحاسب وياخد جزاءه عشان اللي حصل فيا ده مش طبيعي ولسه مصدومة.
