وائل علي عن قلة مشاركته الفنية: مش بإيدي.. وفيه نجوم أكبر مني غايبين عن الساحة
عبّر الفنان وائل علي عن استيائه من قلة الظهور على الساحة الفنية في الفترة الأخيرة، مؤكدًا أن الأمر ليس برغبته، بل يرجع لظروف خارجة عن إرادته، لافتًا إلى أن هناك أسماء فنية كبيرة تمر بنفس الحالة.
وقال وائل علي في تصريحات لـ القاهرة 24: أنا مش مقل في الظهور بمزاجي، فيه أسماء أكبر مني مش موجودة خالص، زي الفنان شريف خير الله، إزاي ميشتغلش؟، إيه اللي ناقصه؟ ده فنان محترم وملتزم وشاطر ومعروف، وقدم أدوار كتير ومهمة، مش بنقول ياخد بطولة، بس على الأقل يبقى موجود.
وأضاف: الواحد بيتضايق حتى لو عنده مصدر دخل تاني، لأن دي شغلتي ومهنتي وتخصصي، الحاجة اللي بحبها، واللي اشتغلت فيها والناس أشادت بيا فيها، طبيعي أزعل لما أكون مش موجود فنيًا، وأسأل نفسي إيه اللي ناقصني علشان مكنش على الساحة؟
وأكد وائل أنه لا يحب اللجوء إلى العلاقات الشخصية من أجل الحصول على عمل فني، معقبًا: أنا مش من الناس اللي بتحب تكلم حد علشان أشتغل، أنا موجود وبسعى، واللي بيتعرض عليا بعمله.. والباقي على ربنا.
تصريحات وائل علي
وسبق وأعلن الفنان وائل علي استياءه من الوسط الفني، بسبب عدم حصوله على فرص منذ فترة طويلة، متسائلًا: ماذا يفعل حتى يحصل عليها؟
وكتب وائل علي، عبر حسابه الشخصي بموقع فيس بوك،: أقسم بالله أنا ممثل، ومهنتي في البطاقة ممثل، هو المفروض نعمل إيه علشان نشتغل في مهنتنا.. حسبي الله ونعم الوكيل.
أعمال وائل علي
يذكر أن وائل علي شارك في مسلسل حرب الجبالي، وتدور أحداث المسلسل في إطار اجتماعي حول الحياة اليومية في حي الجمالية بمصر، حيث تتصاعد الصراعات بين عائلتين ذات نفوذ قوي، في رحلة للوصول إلى السلطة وفرض السيطرة داخل الحي.
وشارك في بطولة مسلسل حرب الجبالي، نخبة من أبرز الفنانين منهم: أحمد رزق، سوسن بدر، رياض الخولي، صلاح عبد الله، فردوس عبد الحميد، إنتصار، والعمل من تأليف سماح الحريري، وإخراج محمد أسامة.
