شريف خير الله: أنا في قمة نضجي الفني.. والناس حاسة إني مش واخد حقي
شكا الفنان شريف خير الله، من قلة العمل، قائلا: إنه يحاول التواصل مع عدد من المخرجين للمشاركة في أعمال فنية ولكن دون استجابة، معربًا عن استنكاره بسبب عدم تقدير تاريخه الفني.
وقال شريف خير الله، في حواره مع الإعلامية سهير جودة في برنامج الستات: أنا موهبتي كويسة وعامل مسلسل الاختيار وهو أكبر مسلسل اتعمل في آخر كام سنة في مصر، وكان دوري مهم وكل البرامج اتكلموا عن شخصيتي في المسلسل وإني راجع بقوة، تبقى النتيجة إني أقعد في البيت من ساعتها؟، مينفعش، أسعى فين؟، 90% من اللي بكلمهم مبيردوش أو بيقولوا معلش إحنا بدأنا خلاص تصوير.
واستنكر عدم تقدير المخرجين لتاريخه الفني، قائلا: أنا دلوقتي في قمة نضجي الفني، ولما بعمل شغل الناس بتسقف، ولو فيه عدل فني هشتغل مساحات وأدوار مناسبة لتاريخي.
وأكد أنه لا يشعر بالظلم الفني، قائلًا: أنا مش حاسس بالظلم الفني ولكني حاسس بفقدان الناس لوجودي، أنا مبسعاش لتريند ولما بشتكي بكتب اللي جوايا وبلاقي رد الفعل كبير لأن الناس بتحبني وأنا صعبان عليهم وحاسين إني مش واخد حقي وأنا موهبة كويسة، أنا مبعملش تريند بحاجة خارجة عن المألوف أو الآداب العامة.
