جنش: مكنتش بلاقي الأكل وأنا في الزمالك واتظلمت آخر سنة
تحدث محمود عبد الرحيم جنش حارس مرمي فريق مودرن سبورت الحالي والزمالك السابق، عن مسيرته مع القلعة البيضاء.
جنش: مكنتش بلاقي الأكل وانا بلعب في الزمالك واتظلمت آخر سنة
وقال محمود جنش حارس مرمى مودرن سبورت، في تصريحات إذاعية: كان بيتقال عليا بعمل مشاكل في الزمالك وكان اللي عامل مشاكل هو اللي بيقول أنا عملت، أنا لما جيت الزمالك في الأول مكنتش باخد فلوس، أول 4 سنين كنت باخد مثلا في السنه 70 ألف جنيه.
وأضاف: كابتن حسن شحاتة لما مسك الزمالك وقتها مكنتش بروح التمرين وكلمني قالي مبتجيش ليه، قولتله مش معايا فلوس، فبعتلي فلوس ولقاني تاني يوم في التمرين، وقتها مكنتش باكل، كنت بجيب مولتو وكشري في الغداء.
وواصل: لما مشيت من نادي الزمالك مسكت فلوس كويسة، وأعلى عقد ليا في الزمالك كان 2 مليون ونص، وآخر سنة قبل ما أمشي اتظلمت فيها.
وزاد: كان بيتكتب عني كلام غلط وأنا قاعد في البيت، والنادي جاب صحفي في أوضة اللبس وقالوله بتكتب عليه ليه كده، قال عشان مبيردش عليا، بعدها كتب عليا كلام حلو وبعتهولي وقالي إيه رأيك كده، وأنا كنت مبحبش أظهر ولا أتكلم، بالرغم من كده، زمان اتقالي من نجم لازم يبقي عندك قاعده إعلامية ويعملوا اللي أنت مبتحبش تعمله.
وأكمل: حسين لبيب قعد معايا وأنا جاي أمشي من الزمالك وقالي الاتحاد السكندري عاوزك، وبعدين قالولي هتروح فيوتشر وأنا معرفش وأصلا في البداية قالولي مش هتمشي حتى لو معاك مشكلة مع مدرب، وقتها كان عندي مشكله مع كارتيرون، وكانت ملهاش علاقة باللعب ورغم كده اتكلم عليا كويس جدا في كل مؤتمر.
واستطرد: الزمالك كلمني أول الموسم اللي فات عشان أرجع ووافقت، كان ليا فلوس في مودرن وعرضت أتنازل وأروح الزمالك، بس لما لقيت الفلوس قليلة، الموضوع باظ، وكان نفسي أساعد النادي وهو كان محتاجني، وكان فيه احتمالية إن عواد يمشي لو أنا روحت.
واختتم تصريحاته قائلًا: في ضربات الجزاء لازم أشتت اللاعب اللي هيشوط عليا والعب على العامل النفسي زي ماتش بيراميدز، كنت بروحلهم لحد نص الملعب، عشان أنا مبحبش أخسر.
