اتجوزنا عن حب.. سيدة تستغيث من العنف الزوجي بالشرقية: بيضربني على أي حاجة وأهلي مش عايزين خراب
استغاثت سيدة تُدعى إسراء عفت من محافظة الشرقية من تعرضها للعنف الزوجي بشكل مستمر مما تسبب لها في أذي نفسي.
سيدة تستغيث من تعرضها للعنف الزوجي
وقالت السيدة في تصريحات خاصة لـ القاهرة 24: أنا دلوقتي في مشاكل كبيرة جدا بسبب أن جوزي على طول بيضربني ضرب شديد لدرجة أنه بيغمى عليا، بسبب خلافات عادية جدا بس هو بيكبرها بالضرب، أول مرة اعتدى عليا فيها بعد 3 سنوات من زواجنا، وحينها حاولت حل الخلافات بيننا وديًا، لكن بعد تكرار الاعتداء مرات عديدة جعلني استعين بعائلتي ومنع زوجي من ضربي.
وعن محاولات تدخل عائلتها لحل الخلافات أضافت إسراء: أهلي وأهله مش عارفين يحلوا وكمان أهلي طيبين مش عايزين خراب بيوت فبيتراجعوا بس نرجع لنقطة الصفر تاني ويرجع يضرب فيا تاني.
وعن الطريقة التي تزوجت بها إسراء، قالت: للأسف جوازنا كان عن حب وقصة حب جميلة بس بعد الجواز مكنش حب كان استغلال واتحولت حياتي لمأساة كل يوم بعيشها.
واختتمت إسراء حديثها، قائلة: كل اللي نفسي فيه إن حد يوقف جوزي عن حدة وعن الضرب اللي بيضربهولي ده أنا فكرت في الطلاق بس مين هيصرف على ولادي ونفسي أي مؤسسة تلحقني وتنجدني من اللي بعيشه.
