مدرب الجيم ضحية ابتزاز فتاتين خلال التحقيقات: أجرت مكانا مخصصا للمساج واكتشفت أنه مخصص للأعمال المنافية ولما طردتهم ابتزوني | خاص
حصل القاهرة 24، على التحقيقات في قضية ابتزاز مدرب جيم على يد فتاتين بمدينة نصر، بعد طردهما لقيامها باستخدام مركز مساج مستأجر للأعمال المنافية للآداب.
تحقيقات قضية جيم مدينة نصر
واستمعت جهات التحقيق جاءت أقوال مدرب الجيم أمام التحقيقات كالآتي:
اللي حصل اني في بنتين طلبوا تأجير السبا الملحقة في الجيم، فاتفقت معاهم علي تفاصيل التعاقد ودفعوا مقدم 30 ألف جنيه إيجار شهر ونص شهر تأمين ودا كان يوم 6/13 وبدوا شغل من تاني يوم بس اتفاجئنا لما بدأوا شغل إن فيه 5 بنات شكلهم غريب واقفين قدام الجيم، وبيدخل رجالة كبار في السن يبصوا عليهم وبعدها يدخل السبا والبنت اللي بص عليها دي تخش وراه فلما لاحظت كده وقفت معاهم شغل يوم 16، وقلتلهم نفض التعاقد وأرجع ليهم فلوسهم، لكنهم رفضوا وجالي بعدها واحد وقالي إنه شغال معاهم وحاول يقنعني إننا نكمل شغل لكني رفضت تمامًا وفضل يحاول يتفاوض معايا لحد يوم 22.
وأضاف مدرب جيم مدينة نصر: لما زهق مني قالي ارجع ليه الفلوس لكن بدل 30 ألف أرجع ليه 45 ألف، فأنا رفضت وحصلت مشادة بيني وبينه ولقيت البنتين دول وقفوا فضلوا يشتمونا وصوروا فيديو في الجيم بيقولوا فيه إننا مركبين كاميرات، وإننا ضربناهم وإننا بنصور الستات في الجيم، فاحنا كلمنا النجدة ورحنا القسم وحصل بينا تصالح ودفعت ليهم 40 ألف جنيه عشان نلم الموضوع، ولما روحت اتفاجئت إنهم نشروا الفيديو دا على التيك توك وإنه جايب مشاهدات كتير رغم إننا اتصالحنا وإني دفعت 10 آلاف جنيه زيادة عشان ألم الموضوع.
وتابع: أنا عايز اتهمهم بالتشهير بيا وبالمكان وبسمعته وإن بسببهم حصلت أضرار ليا في الجيم بس فيه أعضاء كثير استردت فلوسهم ولغت اشتراكها والمبيعات قلت من ساعة ما الفيديو انتشر ودا كل اللي حصل.
